Қазақстан Митрополиттік округінің Басшысы шіркеу ән өнері саласында ұзақ жылдар еңбек еткен қызметкер - Л.П. Милованованың қайтыс болуына байланысты көңіл айтты

18 наурыз 2026 жыл. Алматы. Ұзаққа созылған сырқаттан кейін шіркеу ән өнерін Қазақстан мен Ресейде жаңғырту және дамыту ісіне көптеген жылдар бойы қызмет еткен Любовь Павловна Милованова өмірден өтті.

Жаңадан қайтқан Құдайдың құлы Любовьтың туыстары мен жақындарына Қазақстан Православие шіркеуінің Басшысы, Астана және Қазақстан митрополиті Александр көңіл айтты:

Қадірлі әкелер, ардақты бауырлар мен әпке-қарындастар!

Бүгін біз мәңгілік сапарға Құдайдың жаңадан дүниеден өткен құлы Любовьты шығарып салудамыз. Бұл ізгі жанның өмірден өткені туралы хабар оны таныған, құрметтеген және сүйген жандардың жүрегіне терең қайғы салды. Қайғылы сәттерде біздің Құтқарушымыз Иса Мәсіхтің сөздері жұбаныш пен демеу береді: «Мен тірілу және өмірмін; Маған сенген адам өлсе де, тіріледі. Ал Маған сеніп өмір сүрген әрбір адам мәңгі өлмейді» (Ин. 11:25-26). Өмірдегі жоғалтуларды бастан кешіп жүрген жандарға Құдайға дұға арқылы жүгініп, Жаратушымен байланыс арқылы Оның көмегі мен жұбанышын табу маңызды. Осы орайда Оптина әулиесі Амвросийдің терең рухани даналыққа толы сөздерін еске салғым келеді: «Адамға өлім оның жаны мәңгілікке өтуге барынша дайын болған сәтте ғана беріледі».

Любовь Павловна Милованова алпыс жылға жуық уақыт бойы шіркеу әні саласында еңбек етіп, православиелік музыкалық мәдениеттің жаңғыруы мен дамуына зор үлесін қосты. Шіркеу әкімшілік қысымға ұшыраған күрделі кезеңде ол Алматыдағы Никольский кафедралды соборының клиросына келіп, Мәсіхті ашық әрі батыл дәріптей бастады. Кейін ол Қазақстандағы екі ірі храмның хор ұжымдарын: алдымен Никольский, кейін Вознесенский кафедралды соборын басқарды. Оның еңбегінің арқасында Алматы епархиясында кәсіби хор ұжымы қалыптасып, 2010 жылы Қазақстан Митрополиттік округінің хорының негізіне айналды. Өзінің ынтасы, еңбекқорлығы және православиелік музыкалық өнерге деген адалдығы арқылы Любовь Павловна дін қызметкерлері, приходтар және шығармашылық зиялы қауым тарапынан үлкен құрметке ие болды. Ол Қазақстаннан тыс жерлерде де еңбек етіп, Пермь митрополиясында он жылдан астам уақыт хор ұжымдарын басқарды.

Өмірінің соңғы жылдарында ол ауыр дертпен Құдайдың мейіріміне үміт арта отырып, сабырмен күресті. Мәсіхтің Өмір беруші Крестіне тағзым ету күндерінде ол мәңгілік өмірге өтті. Жердегі өмірінің аяқталуына аз уақыт қалғанда Жаратқан Ие оған Қасиетті Құпияларға қатысып,  «күнәлардың кешірілуі және мәңгілік өмір үшін» Елеосвящение қабылдауға мүмкіндік берді.

Жаратушыға және Қамқоршыға, біз үшін айқышқа шегеленіп, қайта тірілген Құтқарушыға шын жүректен дұға етіп, Құдайдың жаңадан дүниеден өткен құлы Любовьтың көктегі мекендерде – ауру да, қайғы да, күрсіну де жоқ, мәңгілік өмір бар жерде – тыныштық табуын тілейік.

Барша игілікті Жаратқан Ие Өзінің құлының өмірі мен істерін мейірімді үкімімен бағаласын, ал біздің марқұмды еске алуымыз оның жанын көктегі мекендерге орналастыру туралы шынайы дұғамен толы болсын.

Құдайдың жаңадан дүниеден өткен құлы Любовьқа мәңгілік әрі алғысқа толы естелік болсын.

«Иеміз Иса Мәсіх пен бізді сүйіп, мәңгілік жұбаныш пен игі үміт сыйлаған Құдай Әкеміз жүректеріңізді жұбатып, әрбір игі сөз бен игі іске бекітсін» (2 Фес. 2:16-17).