Митрополиттік округ Басшысының митрополит Иосифтің (Чернов) музей-үйінің ашылуында сөйлеген сөзі

Қасиетті архипастырьлар!

Ардақты әкелер!

Қымбатты бауырлар мен әпке-қарындастар!

ХРИСТОС ҚАЙТА ТІРІЛДІ!

Бүгін, Нұрлы аптадағы сейсенбі күні, жердегі және Көктегі Шіркеу өлімнен қайта тірілген Өмір Сыйлаушы Христосты мадақтап, Құдай Анасының ғажайып Иверский иконасын дәріптеп жатқан шақта, біз қуанышты оқиғаның куәсі болып отырмыз – еліміздің Оңтүстік астанасы Алматыда марқұм митрополит Иосифтің (Черновтың) музей-үйі ашылуда. Қайырымды жандардың қолдауымен және бейжай қарамаған адамдардың қатысуының арқасында Алматы епархиялық басқармасының тарихи ғимараты қалпына келтірілді. 1960 жылдан 1975 жылға дейін, он бес жыл бойы, бұл үй сенімнің батыл мойындаушысы әрі тақуалық жолындағы жанкешті қызмет еткен митрополит Иосифтің жұмыс резиденциясы болды. Митрополит Қазақстандағы шіркеу басқаруын ауыр кезеңде қабылдады. Бұл «хрущевтік жылымық» деп аталған уақыт еді, алайда ол Христос Шіркеуі үшін қуғын-сүргін мен қудалаудың қақаған аязына айналды. Қасиетті қария бұл сынақтарға өзі төтеп беріп қана қоймай, атеистік қысымға қарсы тұрып, қолдан келгенше храмдар мен приход өмірін сақтап қалды. Ол қалалық және ауылдық приходтарды аралап жүрді. Олардың кейбірі Алматыдан жүздеген, тіпті мыңдаған шақырым қашықтықта орналасқан еді. Ол өзінің үлгісімен және дана сөзімен дін қызметкерлерін тәрбиелеп, адамдардың жүрегін жалынды да жарқын уағыздарымен жылытты.

Қазақстан кафедрасына тағайындалғанға дейін митрополит Иосиф бірнеше рет тұтқындалып, гестапоның қорлығын көріп, жиырма жылдан астам уақытын лагерьлер мен түрмелерде өткізді. Денесінің әлсіздігі, өмір бойы қолы мен аяғындағы ауырсыну оның тартқан азабының өшпес ізі болып қалды.

Соған қарамастан, архипастырь Інжілге сай кешіре білді. Қаншама қайғы мен ауыртпалықты бастан өткерсе де, ол әрдайым шынайы мейірімділігі мен кең пейілін сақтады. Замандастарының айтуынша, ол өзіне келген әрбір адамға Құдайдың тірі бейнесі ретінде қараған. Оның көрегендігі мен дұғасының зор күші туралы көптеген естеліктер сақталған. Жастайынан Құдай Ананы ерекше қастерлеген митрополит Иосиф Құдай Анасының Успение мерекесі күндерінде мәңгілік өмірге аттанды.  Бұл оның Құдай Ұлына адал қызметші болғанының белгісі еді. 

Біз қасиетті елші Павелдің: «Ұстаздарыңды еске алыңдар» (Евр. 13:7) деген өсиетін міндетті түрде орындауымыз керек. Митрополит Иосифтің өміріне деген қызығушылық – бұл біздің ұлттық тарихымызға және Ана Шіркеуіміздің тарихына деген терең құрметіміздің белгісі. Өйткені қасиетті қарияның өмірі еліміздегі көп азап шеккен православие халқының тағдырынан ажырамайды. Оны қастерлейтін жандардың ыждағатымен жиналған бірегей жәдігерлер музейге келушілерге митрополит Иосифті қоршаған шынайы мейірімділік пен адамсүйгіштік рухын сезінуге, оның қарапайымдылығы мен кішіпейілділігін көруге, Құдай мен адамдарға деген ыстық сүйіспеншілігін тануға көмектеседі.

Мемориалдық үйдің интерьері қасиетті архипастырь ерекше құрметтеген иконалармен безендірілген. Олардың қатарында болашақ иерархтың балалық және жастық шағын жарықтандырған Құдай Анасының Белыничский иконасы; митрополит ерекше дұға етуді жақсы көрген қасиетті Николай Чудотворецтің иконасы; митрополит Иосиф «менің епархиялық хатшым, Алматы епархиялық басқармасының инспекторы» деп атаған  Верхотурскийдің әділ Симеон бейнесі; сондай-ақ XIX ғасырда қасиетті Афон тауындағы Әулие Пантелеимон монастырінде жазылған және ұзақ жылдар бойы митрополиттің жеке иконасы болған Құдай Анасының Иверский иконасы бар.

Музей қоры он жылдан астам уақыт бойы жинақталды. Құдайға шүкір, митрополит Иосифті жақсы білген адамдар табылып, өз үлестерін қосты. Олар – қасиетті архипастырьдың рухани балалары, Алматы епархиялық басқармасының қызметкерлері, Қазақстан, Ресей, Беларусь және Украина дін қызметкерлері мен олардың туыстары. Бүгінде атқарылған ауқымды жұмыстың арқасында музейге келушілер сенім мойындаушысының ғибадат киімдерін, жеке заттарын, шіркеу бұйымдары мен көне кітаптарды, күнделік жазбаларын, архипастырь өз қолымен жазған акафистерді, сирек фотосуреттер мен құжаттарды көре алады. Сол дәуірдің рухын қасиетті адамның қалпына келтірілген кабинеті айқын сездіреді. Бұл бөлме бір мезгілде әрі жұмыс кабинеті, әрі дұға етуге арналған келья болған.

Митрополит Иосифтің (Чернов) мемориалдық үйіне келу – ХХ ғасырдың қайғылы кезеңіндегі Шіркеу тарихымен жай ғана танысу емес. Осы қабырғалардың ішінде әр адам марқұм әділ жанмен, көреген әрі керемет жасаушы рухани әкемен ерекше жүздескендей болады.

Бұл табалдырықтан аттаған әрбір жан қасиетті қариямен дұға арқылы сырласуға, оның рухани қолдауы мен көмегін сезінуге мүмкіндік алады. Музей-үйдің есігі сенушілерге де, Құдайды іздеушілерге де, барлық ұлттар мен конфессия өкілдеріне де, үлкендер мен балаларға да бәріне ашық 

Қасиетті Жазбада: «Әділдер мәңгі өмір сүреді» делінген. Сондықтан біз митрополит Иосифтің дұғалары бізді қиындықтар мен қайғыдан қорғайтынына және өмір жолымызда жәрдем беретініне сенеміз.

Музейдің ашылуы жолында еңбек еткендердің бәріне және митрополит Иосифтің (Черновтың) мемориалдық үйіне келетін барлық адамдарға Қайта тірілген Әлем Құтқарушысының батасын тілеймін.

ШЫНЫМЕН ДЕ ХРИСТОС ҚАЙТА ТІРІЛДІ!