Қасиетті әкелер, қадірлі бауырлар мен әпкелер!
ХРИСТОС ТІРІЛДІ!
Бүгін қайта тірілген Христос туралы қуанышқа толы, жанды құтқарушы Пасха күндері ерекше рухани шаттық нұрымен сәулеленуде. Біз Қарағанды қаласы мен бүкіл Қазақстан жерінің көктегі қамқоршысы – ХХ ғасырдағы сенім мойындаушысы, Оптина шөлінің соңғы ақсақалдарының бірі, Қарағандылық әулие әрі Құдай рухын иеленген әкей Севастианның құрметіне арналған мерекені атап өтудеміз.
Әулие Севастианды біздің замандасымыз деуге болады – қасиетті ақсақалдың дүниеден өткеніне небәрі 60 жыл болды, оның кейбір рухани балалары әлі де арамызда. Әулие мойындаушының өмір жолы сенімсіздік пен зұлымдық жайлаған қазіргі дүниеде өмір сүріп жатқан бәріміз үшін өнеге болып табылады.
Қарағандылық тақуа жастайынан ата-анасынан Православие негіздерін алып, Христосқа терең сенді. Төрт жасында алғаш рет Оптина монастыріне барған кезде ол монашестваның рухани сұлулығына мәңгілік тәнті болды. Сол кездің өзінде, қасиетті шомылдыру рәсімінде Стефан деп аталған болашақ әулиенің жүрегін Құдайға толық қызмет етуге деген тілек биледі. Орел өлкесіндегі қарапайым әрі кішіпейіл жас жігіт Христос Шіркеуіне мойынсұнып өмір сүруді, өзінің барлық күш-қуаты мен дарынын жақындарының рухани игілігіне арнауды, өз өмірінде Құдай еркін орындауды қалады. Осылайша ол Ресей Православиесінің ең ірі рухани орталықтарының бірі – Оптина монастырінде әуелі тәлім алушы, кейін монах болды.
Кейінірек ақсақал былай дейтін: «Құдайға өзіңді бәрінен айырылғаннан кейін емес, жас кезіңнен, күш-қуатың, денсаулығың, тазалығың мен сергек рухың бар уақытта арнау керек».
Оптина монастырі монах Севастиан үшін дұға, мойынсұну, төзім мен кішіпейілдіктің мектебі болды. Бүкіл Ресейге танымал иеросхимонах Иосиф (Литовкин) пен иеромонах Нектарийдің (Тихонов) рухани ерліктерінен шабыт алған ол көптеген рақымға толы дарындарға ие болды. Кейін соларды өзінің сансыз рухани балаларына жомарттықпен бөліп берді.
«Өз еркін емес, Құдайдың еркін орындайтын адам бақытты. Уа, Ием, мен бүкіл жаныммен де, жүрегіммен де Өзіңнің еркіңе бой ұсынамын. Менімен Өзіңе ұнағанды істе», – деген әулие Севастианның сөзі оның бүкіл өмірінің мәнін, барлық еңбегі мен қызметінің сипатын айқындайды.
Арада біраз уақыт өткен соң, инок Севастианға отты сынақтар мен қатыгез қудалауларға толы тікенекті жолға түсу жазылды. Бірақ осы айқыш жолында оны ешқашан «Құдай рақымының Ізгі хабарын уағыздау» ниеті тастамады. «Өз өмірімді қымбат көрмеймін, тек Иеміз Иисустан қабылдаған қызметімді қуанышпен аяқтасам болды» – Севастиан ақсақалдың тынымсыз рухани қызметі осындай еді.
«Ақиқат ол үшін адамдар жанын қиғанда салтанат құрады», – деп ол Православие сенімі үшін азап шеккен рухани балаларына жұбаныш айтатын.
Дәл Орыс Православие Шіркеуіне қарсы қатыгез қудалау жылдарында Құдайдың еркімен әулие шіркеу өмірінің жаңа бір кезеңін – жер аударудағы ақсақалдық дәуірін ашты.
Ізгі хабар ақиқатын берік мойындағаны үшін кішіпейіл әке жеті жыл концлагерьде жұмыс істеуге сотталды. 1934 жылдан бастап Қарағанды әулие Севастианның өміріне мәңгілік енді.
Түрмелер мен лагерьлерден, аштықтан, аурудан және ауыр еңбектен титықтағанына қарамастан, Карлагтан босап шыққан соң әулие Севастиан Ресейге оралу мүмкіндігінен бас тартты: «Біз осында тұрамыз. Мұнда өмір де, адамдар да бөлек. Мұндағы адамдар – жаны кең, саналы, көп қайғы көрген жандар. Біз осында көбірек пайда келтіреміз. Бұл – біздің екінші Отанымыз. Мен осында қаламын!»
Осы сөздерден әулие Севастианның бүгін Қазақстан жерінде өмір сүріп жатқан бәрімізге қалдырған өсиеті естіледі: Құдайдың Өзі бізге тапсырған қызметті – Қазақстандағы православиелік қасиетті орындарды сақтау мен еліміздің рухани өмірін дамыту міндетін орындауымыз керек.
Қасиетті ақсақал Қазақстан жерін ерекше жақсы көрді. Дәл осы жерде ол ұлы дұғашы, көреген әрі ғажайыптар жасаушы болды. Қарағандының Михайловкасындағы оның күшімен атеистік қудалау жылдарында бой көтерген кішкентай храм бүкіл елдің әр аймағынан рухани жұбаныш пен демеу іздеп келген жүздеген мың адам үшін екінші Оптинаға айналды.
Алматы және Қазақстан митрополиті Иосиф (Чернов) қасиетті Севастиан туралы былай деген еді: «Ол бәріне кішіпейілділікпен төзіп, барлығы үшін Құдайдан құтқарылу мен ақыл сұрап дұға етті. Оның көз жасы мен дұғалары үшін Қасиетті Рухтың рақымы Қарағандыда екінші келуге дейін сақталады».
Әулие бізге үш ұлы мұра қалдырды: оның рухани балалары мен замандастары сипаттап кеткен ізгі өмірінің үлгісі; оның рухқа толы өсиеттері, уағыздары мен тәлімдері; сондай-ақ Құдайға сеніммен дұға етіп жүгінетіндердің бәріне көмек пен шипа сыйлайтын қасиетті жәдігерлері.
Әулие Севастиан дұға еткен орынның жанында Қасиетті Үштікке арналған айбынды собор тұрғызылды. Ол бізден кейін осы қасиетті Қазақстан жерінде өмір сүретіндердің бәріне Қарағандылық ақсақалдың еңбегі мен архипастырьлар, пастырьлар, монахтар және қарапайым сенушілер – жүздеген мың азап шеккендердің ерлігі туралы еске салып тұратын болады. Дәл солар – жаңа азап шегушілер мен мойындаушылар – бүгін біз рухани өмірімізді құрып отырған іргетасты қалады. Олардың дұғалы шапағаты Ұлы дала кеңістігіндегі Православиені осы күнге дейін сақтап келеді және ақырзаманға дейін сақтай бермек.
Әулие Севастиан жердегі өмірінде қалай дұға еткен болса, қазір де көктегі мекендерде Құдай тағдырының алдында тұрып, өзінен көмек сұраған, қасиетті жәдігерлеріне үмітпен тағзым еткен, жұбаныш пен жәрдем сұраған әр адам үшін дұға етеді. Қарағандылық әулие көрсеткен ғажайыптар өте көп: адамдардың жан және тән аурулары жазылып жатыр, қайғылар сейіліп, өмірлік жағдайлар игілікке қарай өзгеріп, ең қиын сұрақтарға жауап табылуда.
Осы мерекелі күні әулиенің бізге қалдырған өсиетіне тағы бір рет назар аударайық: «Мен сендерден бір ғана нәрсе сұраймын: татулықта өмір сүріңдер. Татулық пен сүйіспеншілік – ең бастысы. Егер сендерде осы екеуі болса, жүректеріңде әрдайым қуаныш болады. Оған тек татулықпен, сүйіспеншілікпен және шынайы жүрек дұғасымен ғана жетуге болады».
Қарағандылық әулие Севастианның естелігі бізді Қазақстанның тыныштығы мен гүлденуі үшін, сондай-ақ орыс Православиесінің канондық кеңістігіне кіретін барлық елдер мен халықтардың амандығы үшін ерекше дұға етуге үндейді.
Құдай бізге Қарағандылық тақуаның көрсеткен ізгілік тәжірибесінен үлгі алып, жанымыз бен жүрегімізді тазартуға, өмірімен Құдай мен жақынға деген сүйіспеншілік өсиетін орындаған православиелік әулиелердің жақсы үлгісіне еруге нәсіп етсін.
Қарағандылық әулие Севастианның дұғаларымен Иеміз Православие Шіркеуін және Қазақстан жерін сақтасын әрі бізде елші айтқан Қасиетті Рухтың жемістерін: сүйіспеншілік, қуаныш, татулық, шыдамдылық, мейірімділік, қайырымдылық, сенім, момындық және ұстамдылықты көбейтсін.
Баршаңызды Христостың Қайта тірілуі мерекесімен және әулие Севастиан күнімен шын жүректен құттықтаймын және өмірдің өлімді жеңген ұлы әнұранын жариялаймын:
ХРИСТОС ТІРІЛДІ! – ШЫНЫМЕН ТІРІЛДІ!
Пасхалық қуанышпен және Құдайдың жарылқауын тілей отырып,
ҚАЗАҚСТАН ПРАВОСЛАВИЕ ШІРКЕУІНІҢ БАСШЫСЫ
АСТАНА ЖӘНЕ ҚАЗАҚСТАН МИТРОПОЛИТІ АЛЕКСАНДР
Басты бет
Пікір жазу үшін жүйеге кіріңіз немесе тіркеліңіз!
Пікіріңіз сәтті қосылды және оны қазір сайт әкімшілігі қарастырып жатыр