Қазақстан Православие Шіркеуінің Басшысы, Астана және Қазақстан митрополиті Александрдың Успен оразасы басталар алдындағы сөзі

Ардақты бауырластар!

«Құдайдың Қасиетті және Өмір Беруші Крестінің ежелгі ағашының шығарылуы» мерекесі бізді Успен оразасының қасиетті күндеріне бастайды. Өмір Беруші Ағашқа тағзым етіп, одан тарайтын рақыммен нығайып, біз еселенген дұға мен ұстамдылық жолындағы рухани жолына қадам басамыз. Құдай Анасының Успениясы мерекесінің алдында ұсталатын екі апталық оразаны Шіркеу Ең Қасиетті Мәңгі Бикенің өнегесіне сай белгілеген.Аңыз бойынша, Ең Қасиетті Құдай Анасы жердегі өмірден көктегі әлемге аттанатын уақытының жақындағанын білгенде, бұл оқиғаға ораза ұстап және күшейтілген дұға арқылы дайындала бастаған.

Тағамға қойылатын шектеулердің қатаңдығына қарамастан, Успен оразасы —     қуанышқа толы кезең. Өйткені Құдай Ананың дүниеден өтуінде өмірдің жоқтықты түпкілікті жеңгенін білдіретін белгі көрініс тапқанын еске аламыз. Иеміз Қайта Тірілудің даңқына алғаш болып Онымен бірге ортақтасу мүмкіндігін Оған сыйлады. Қасиетті Жазбаның куәлік етуінше: «Мәсіх өлілердің арасынан қайта тіріліп, енді өлмейді: өлім енді Оған билік жүргізбейді» (Рим. 6:9). Сол сияқты Құтқарушының Анасы, дұғаларда ұйқысыз тұратын Құдай Анасы да қабір мен өлімнің құрсауында қалмады.

Ораза уақыты бізге шын мәнінде жұбаныш пен рухани жаңаруға әкеліп, Мәсіхпен және Оның Пәк Анасымен кездесуге лайықты дайындық болуы үшін қасиетті әкелер мен Шіркеу ұстаздарының өсиеттерін орындауымыз қажет. Олардың барлығы оразаның рухани құрамдас бөлігінің маңыздылығын бірауыздан атап көрсетеді: үйдегі дұға тәртібін бұлжытпай орындау, Қасиетті Жазбаны оқу, Құдайдың ғибадатханасына жиі бару және тәубе ету мен Қасиетті Қауымдастықтың құтқарушы Құпияларына міндетті түрде қатысу. Мәсіхтің Тәні мен Қанын қабылдау арқылы біз Иеміздің жүзеге асырған құтқару ісіне ортақтасамыз. Ал Өмір Беруші әрі ұлы Құпияларға қатыса отырып, күнәларымыз кешіріліп, ішкі жан дүниеміз өзгеретін ұлы рақым сыйына ие боламыз.

Успен оразасы — Көктегі Патшайымға Оның бізге көрсеткен сансыз игіліктері үшін ерекше алғысымызды білдіретін уақыт. Сондықтан осы күндері Ең Қасиетті Құдай Анасына ерекше ыждағатпен дұға етіп, канондар мен акафистерді оқу арқылы Оны мадақтауымыз орынды. Алайда оразаның бұдан кем емес маңызды бөлігі — өмірімізді түзету және Құдай Анасының даңқы үшін игі істер жасау. Қасиетті Иоанн Дамаскин былай деп кеңес береді: «Құдайдан кейін баршадан ең пәк болған Оны жанымыз бен тәніміздің тазалығымен ұлықтайық. Мұқтаждарға мейірімділік пен жанашырлық танытып, Оған қызмет етейік. Өйткені егер Құдайға мейірімділіктен басқа ештеңемен қызмет ете алмасақ, Оның Анасы да осыған қуанады».

Афонның ежелгі патеригінде Көктегі Патшайымға адамның кейде қаншалықты рақымсыз болатыны туралы тағылымы мол бір оқиға баяндалады. Бір монастырьда бір монах өмір сүріп жатты. Бір күні оның өмірінде сынақтар, қайғы-қасірет пен қиындықтар кезеңі басталды. Бірде храмда жалғыз қалған ол үмітсіздікке салынып, түрлі ойлардан азап шегіп, Құдай Анасының иконасына жақындап, батылдықпен әрі өкпе-назбен: «Менің Анам екеніңді дәлелде!» — деді. Сол сәтте Қгдай Анасының пәк жүзінен оның құлағына Оның баяу айтылған дауысы естілді: «Ей, ақылсыз, алдымен менің ұлым екеніңді дәлелде, сонда Мен саған Өзімнің көптеген әрі мол мейірімімді көрсетемін».

Бұл оқиға — бәріміз үшін аса маңызды сабақ. Біз қиындықтар мен қайғы-қасіреттен құтқаруын, әлсіздіктерімізді сауықтыруын, ауруларымызды емдеуін, өміріміздің түрлі жағдайларында көмек беруін сұрап, Жәрдемші Құдай Анаға жиі жүгінеміз. Кейде дұғамыз тым талапшыл әрі өктем болуы мүмкін. Алайда біз тек табанды өтініш жасаушылар ғана емес, Құдай Анасының лайықты перзенттері болуымыз керектігін ешқашан ұмытпауымыз керек. Сөзбен ғана емес, іспен де Оның мойынсұнғыш балалары болып, Билеуші Көктегі Патшайымды бізге молынан жіберілген игіліктері үшін ізгі істерімізбен және тақуалықпен өмір сүруіміз арқылы алғысымызға бөлеуіміз қажет.

Құдай Анасына арналған оразаның берер рухани сабақтарының бірі — отбасындағы татулықты сақтауға қамқорлық жасау, ерлі-зайыптылардың, балалар мен ата-аналардың арасындағы сүйіспеншілікті нығайту. Алда келе жатқан қасиетті күндерде, ең алдымен, туған-туыстарымызбен және жақындарымызбен қарым-қатынасымызды түзетуге, ескірген өкпе-реніштерді кешіруге, немқұрайлылықты жоюға, ұрыс-керіс, қызғаныш пен ашушаңдықты түп-тамырымен арылтуға тырысайық.

Берік христиандық отбасы — кішігірім Шіркеу ғана емес, айналасындағыларға Құдайдың игіліктері мен батасының қайнар көзі әрі Ізгі хабарды уағыздаудың тамаша құралы. «Менің шәкірттерім екендеріңді жұрттың бәрі осылай білетін болады: егер бір-біріңді сүйетін болсаңдар» (Ин. 13:35), — дейді Иеміз. Әділ протоиерей Иоанн Кронштадтский былай деп үйреткен: «Егер өзара сүйіспеншілікте өмір сүрсеңдер, өздеріңе Құдайдың рақымын түсіресіңдер — сонда Құдай сендердің бойларыңа қонып, барлық бастамаларыңыз бен істеріңізге береке беріп, игі нәтижеге жеткізеді. Өйткені сүйіспеншілік бар жерде — Құдай бар, ал Құдай бар жерде — барлық игілік бар».

Көктегі Патшайымның дұғалары арқылы, Успениесінде де бізді тастамайтын Иеміз алдағы қуанышты ораза жолын өзімізге де, жақындарымызға да пайдалы етіп өтуімізге және «Құдайдың бейнесі бойынша жаратылған, шынайы әділдік пен қасиеттілікке ие жаңа адамға айналуымызға» (Еф. 4:24) нәсіп етсін.

Құдайдың батасын тілей отырып,

ҚАЗАҚСТАН ПРАВОСЛАВИЕ ШІРКЕУІНІҢ БАСШЫСЫ

АСТАНА ЖӘНЕ ҚАЗАҚСТАН МИТРОПОЛИТІ