Астана және Қазақстан митрополиті Александрдың ізгі кнәз Александр Невский мен қасиетті Александр Свирскийді еске алу күніне арналған сөзі

Құрметті архипастыр бауырларым, Христос жолындағы сүйікті бауырластарым!

Қадірлі әкелер! Қымбатты бауырлар мен әпке-сіңлілер!

Бүгін біз ізгі ұлы кнәз Александр Невский мен Свирский монастырының игумені, қасиетті Александрды дұға арқылы еске алып отырмыз. Інжілде бір адамның Христостан: «Ием! Құтқарылатындар аз ба?» – деп сұрағанын оқимыз. Құтқарушы оған: «Тар қақпадан кіруге тырысыңдар, өйткені сендерге айтамын: көп адам кіруге ұмтылады, бірақ кіре алмайды», – деп жауап берді (Лк. 13:23–24).

Әулиелер, қасиетті Құдайдың жолындағылары – мәңгілік өмірге бастайтын «тар» жолды таңдаған, сол жолды соңына дейін жүріп өткен және сансыз көп діндарлар үшін үлгі болған адамдар. Олар өз өмірі мен рухани ерліктері арқылы бүкіл әлемге Құдай өсиет еткен қасиеттілік қол жетпейтін мұрат емес, барлық христиандар бағдар етуге тиіс норма екенін көрсетті.

Невскийдің ізгі билеушісі мен Свирский игумені бір-бірінен әлеуметтік жағдайы, өмір сүрген тарихи дәуірі, сондай-ақ Құдайға және адамдарға қызмет ету сипаты жағынан ерекшеленеді. Алайда бұл әулиелердің арасында айқын айырмашылықтар болғанымен, князь Александр мен монах Александрдың өмірінде белсенді қызмет пен рухани толғаныстың, жанқиярлық еңбектер мен терең, жүрекжарды дұғаның үйлесімді ұштасуы оларды жақындастырады.

Осы тұрғыдан алғанда, олар біз үшін ізгі үлгі болып табылады. Егер біз өмірімізді Інжіл өсиеттеріне сай түзеп, өзгертіп, оны Құдайға ұнамды еткіміз келсе, онда еңбектеніп әрі дұға етуіміз қажет. Дұға мен еңбек – құтқарылуымыздың қажетті шарттары, бізді Көкке көтеретін қос қанат.

Бүгін еске алынып отырған әулиелерге арналған Апостолдық оқылымда мынадай сөздер айтылады: «Бір-біріңнің ауыртпалықтарыңды көтеріңдер, сонда Мәсіхтің заңын орындайсыңдар» (Гал. 6:2).

Ізгі кнәзАлександр мен қасиетті игумен Александр өзге адамдардың ауыртпалығын өз мойындарына алды, халықтың қайғы-қасіретін жүректеріне қабылдады. Сондықтан біз оларды Мәсіхтің Заңын толық орындаған ұлы Құдай сүйікті құлдары ретінде ұлықтаймыз және олардың біз үшін, туған-туыстарымыз бен жақындарымыз үшін, өзіміз өмір сүріп жатқан ел – қасиетті Қазақстан үшін Жаратушы Иенің алдында өтініш білдіруші әрі қорғаушы болуын сұрап дұға етеміз.

Бүгін менің атыма тезоименитство күніме байланысты құттықтау сөздері айтылды. Мұндай жағдайларда әрдайым мадақ сөздерге жауап бергенімдей, тағы да псалм жыршысының сөздерін қайталаймын: «Бізге емес, бізге емес, Ием, Өзіңнің есіміңе даңқ бере гөр» (Пс. 113:9).

Өткен уақытта да, қазіргі кезде де шіркеу саласында атқарылған істердің бәрін, қол жеткізілген ізгі нәтижелердің барлығын өзіме емес, барлық игіліктердің Берушісі – Құдайға жатқызамын. Мен үшін ерекше әрі естен кетпес күндерде ой-толғаныстарымның басты тақырыбы міндетті түрде Жаратушыға және Оның құдіретті қамқорлығына ризашылық білдірумен, сондай-ақ Иеміздің менімен бірге өмір жолында жүруді белгілеген адамдарға алғыс айтумен байланысты болады. Қасиетті ризашылық сезімі адамға қоршаған шындықты дұрыс қабылдауға, болып жатқан оқиғалардан Құдайдың жоспарын көруге көмектеседі.

Бүгін менімен бірге осы мерекені дұға арқылы бөлісіп отырған, өз дұғаларында мені еске алатын, Қазақстан жеріндегі Православие дінінің игілігі үшін менімен бірге еңбек етіп жүрген баршаңызға шын жүректен алғысымды білдіремін.

Біздің ұлы әміршіміз әрі әкеміз, Мәскеу және бүкіл Русьтің Қасиетті Патриархы Кириллге терең ризашылығымды жеткіземін. Мен әрдайым Оның Қасиетті мәртебесінің рухани қолдауын сезінемін. Біздің Предстоятель баршамызға – архипастырларға, дін қызметкерлеріне және миряндарға – аскеттік қызметтің тамаша үлгісін көрсетіп, шіркеу ісіне белсенді араласуға шабыттандырады.

Ізгі кнәз Александр Невский мен қасиетті Александр Свирскийдің дұғалық қолдауымен баршамызға «сенімде қуаныш пен тыныштыққа» бөленуді (Рим. 15:13), Өмір Беруші Христостан мол мейірім мен бізге жар болуын тілеймін.