Митрополит Александр Алматылық қасиетті шейіттер Серафим мен Феогносттың қасиетті жәдігерлерінің табылғанына 25 жыл толуы және Серафимо-Феогност ерлер монастырінің құрылғанына 30 жыл толуына арналған іс-шараларды өткізу мәселесі бойынша кеңес өткізді

13 ақпан 2026 жыл. Алматы. Митрополит Иосифтің (Чернов) атындағы Қазақстан Митрополиттік округтің әкімшілік және рухани-мәдени орталығында Қазақстан Православие Шіркеуінің Басшысы Астана және Қазақстан митрополиті Александр жұмыс кеңесін өткізді.

Кездесудің басты тақырыбы биыл атап өтілетін рухани маңызы зор күндер – Алматылық қасиетті шейіттер Серафим мен Феогносттың қасиетті жәдігерлерінің табылғанына 25 жыл толуына және Ақсай шатқалындағы Серафимо-Феогност ерлер монастырінің құрылғанына 30 жыл толуына дайындық мәселесі болды. Бұл мекен – Оңтүстік астана мен Жетісудың рухани қамқоршыларының тақуалық ерліктері мен азап шегіп қаза тапқан қасиетті орны.

Кеңеске қатысқандар: Митрополиттік округ істерін басқарушысы Каскелендік епископ Геннадий; Астана епархиясының викарийі, Талдықорған епископы Клавдиан; Митрополиттік округтің хатшысы, Ресейдің еңбек сіңірген өнер қайраткері О.Н. Овчинников; Никольский соборының басшысы, Алматы шіркеу округі храмдарының құрметті өкілі протоиерей Валерий Захаров; Вознесенский кафедралды соборының кілтшісі, Митрополиттік округтің қоғаммен байланыс бөлімінің жетекшісі протоиерей Александр Суворов; Алматы рухани семинариясының ректоры, Митрополиттік округтің ақпараттық-баспасөз бөлімінің жетекшісі протоиерей Евгений Иванов; Серафимо-Феогност Ақсай ерлер монастырінің басшысы игумен Трифон (Печковский); Митрополиттік округ басшысының әкімшілік хатшылығының жетекшісі иерей Георгий Сидоров; митрополиттің протокол қызметінің жетекшісі протодиакон Роман Головин; Алматы епархиялық басқармасының қызметкерлері.

Жиналыс барысында мерейтой қарсаңында және оны атап өту аясында өткізілетін іс-шаралардың алдын ала тізімі белгіленді.

Митрополит Александр ізгілік жолындағы әрбір тақуа жанның, Інжіл ақиқатын таратуға еңбек сіңірген әрбір жанның, Мәсіх үшін жанын қиған әрбір шейіттің рухани мұрасын құрметпен сақтау – православиелік христианның қасиетті парызы екенін атап өтті.

«Олар біздің мадақтауларымыз бен дұғаларымызға мұқтаж емес, керісінше біз олардың күнделікті көмегі мен қолдауына мұқтажбыз», – деп атап көрсетті архипастырь.

Мерейтойлық салтанаттардың орталығы Серафимо-Феогност ерлер монастырі болмақ. Мұнда қазақстандық иерархтардың қатысуымен мерекелік құлшылықтар өткізіледі.

Бағдарламада сондай-ақ монастырдің тарихы мен өмірі туралы фотокөрме өткізу, деректі фильм түсіру, конференция ұйымдастыру және рухани-ағартушылық, жастарға арналған әрі мәдени сипаттағы өзге де іс-шаралар қарастырылған.

Кеңес соңында Митрополиттік округ басшысы барша қатысушыларға еңбектері үшін алғысын айтып, дін қызметкерлері мен епархиялық қызметкерлерге тиісті тапсырмаларды берді.