Иверско-Серафимовский әйелдер монастырінің тұрғыны, схимонахиня Ирина (Любицкая) 101 жасында дүниеден өтіп, Жаратқан Иенің құзырына өтті

30 наурыз 2026 жыл. Алматы. Иверско-Серафимовский әйелдер монастырінің ең қарт тұрғыны, Ұлы Отан соғысының ардагері – схимонахиня Ирина (Любицкая) 101 жасында Жаратқан Иенің құзырына өтті.

Марқұм схимонахиняны жерлеу рәсімін Астана және Қазақстан митрополиті Александр атқаратын болады. Жерлеу алдындағы қоштасу және жаназа рәсімі 1 сәуір күні Иверско-Серафимовский монастырінің София соборында Алдын ала қасиеттелген Сыйлар Литургиясынан кейін өтеді. Литургия сағат 8:30-да басталады.

Схимонахиня Ирина 1925 жылғы 18 сәуірде Орынбор облысының Беседено ауылында дүниеге келген.

Ұлы Отан соғысының алғашқы күндерінен бастап ол болашақ Жеңіс үшін тылда еңбек етті. 1942–1945 жылдары Тәжікстанда майданда жараланған жауынгерлерді орналастыру үшін ашылған эвакуациялық госпитальдарда жұмыс істеді, ал кешкі уақытта медицина техникумында фельдшер бөлімінде оқыды. Соғыс жылдарындағы Отан игілігі жолындағы жанқиярлық еңбегі үшін «Тыл еңбеккері» атағына ие болды. 1947–1981 жылдары Алматы қаласының жедел жәрдем қызметінде фельдшер болып еңбек етті.

1948 жылы, сенім жолындағы мойындаушы әулие митрополит Николай (Могилевский) Қазақстан архипастырлық кафедрасына тағайындалғаннан кейін көп ұзамай, ол Алматы қаласындағы Әулие Николай соборының сол қанатындағы клироста әнші болып қызмет ете бастады. 1952 жылғы 23 тамызда митрополит Николайдың батасымен ХХ ғасырдың орта тұсындағы көрнекті шіркеу қайраткері архимандрит Исаакий (Виноградов) оны монахтыққа қабылдау рәсімін жасады. 1981 жылға дейін монахиня Ирина Алматы епархиялық басқармасында түрлі мойынсұну қызметтерін атқарды және оны ауруханадағы жұмысымен қатар алып жүрді; көптеген жылдар бойы ( 60 жылдан астам) клироста әнші болды.

Қазақстанның Оңтүстік астанасында Иверско-Серафимовский монастырі қайта жанданғаннан кейін, 2009 жылдан бастап оның тұрғыны болды. 2011 жылғы 12 сәуірде ұлы схиманы қабылдады.

2025 жылғы 22 сәуірде Мәскеу және бүкіл Русь Патриархы Кириллдің Жарлығымен схимонахиня Ирина (Любицкая) Орыс Православие Шіркеуінің әйелдерге арналған ең жоғары марапаты – қасиетті апостолдарға тең княгиня Ольганың I дәрежелі орденімен марапатталды.

Астана және Қазақстан митрополиті Александрдың ұсынысы бойынша Ресей Президенті В.В. Путиннің 2025 жылғы 15 қазандағы №728 «Ресей Федерациясының мемлекеттік наградаларымен марапаттау туралы» Жарлығына сәйкес, туғанына 100 жыл толған схимонахиня Достық орденімен марапатталды. Ұлы Жеңістің 80 жылдығы аталып өткен жылы Ресей мемлекетінің басшысы шіркеу қызметкері мен ардагердің еңбегін, тарихи және мәдени мұраны сақтау мен насихаттауға қосқан үлесін жоғары бағалады.

Қазақстан Республикасының Президенті Қ.-Ж.К. Тоқаевтың 2025 жылғы 26 наурыздағы №825 Жарлығына сәйкес, схимонахиня Ирина (Любицкая) Ұлы Отан соғысындағы Жеңістің 80 жылдығына орай тағайындалған «1941–1945 жж. Ұлы Отан соғысындағы Жеңіске 80 жыл» мемлекеттік мерейтойлық медалімен марапатталды.