Қазақстан Православие Шіркеуінің Қоғаммен байланыс бөлімі жануарларға ізгілікпен қарау туралы мәлімдемесі

Қазіргі уақытта қазақстандық қоғамда жануарларға ізгілікпен қарауға қатысты пікірталас жүріп жатыр.

Қазақстан Православие Шіркеуінің Қоғаммен байланыс бөлімі жануарлар құқықтарын қорғаушылардың өтініштеріне жауап бере отырып, көтеріліп отырған мәселенің адамның қоршаған әлем алдындағы адамгершілік жауапкершілігінің маңызды саласына қатысты екенін атап өтеді.

Христиандық түсінік бойынша адам Құдай жаратылысының сақтаушысы болуға шақырылған: «Құдай Ие адамды алып, оны өңдеп, қорғауы үшін Едем бағына орналастырды» (Быт. 2:15).

Осыған байланысты Православие Шіркеуі жануарларды жоюды қалыптасқан мәселені шешудің негізгі немесе жол берілетін тәсілі ретінде қарастыратын ұстанымды қолдай алмайды. Қасиетті Жазбада: «Әділ адам малының да қамын ойлайды» (Притч. 12:10) деп айтылған, бұл әрбір тіршілік иесіне мейірімділікпен қараудың адамгершілік маңызын көрсетеді.

Сонымен қатар, қарастырылып отырған мәселенің кешенді сипатқа ие екенін және қоғамдық қауіпсіздік, санитарлық әл-ауқат пен мемлекеттік органдардың жауапкершілігі мәселелерін қамтитынын атап өткен жөн. Мұндай жағдайда қоғам ізгілік, парасаттылық және жауапкершілік қағидаттарына негізделген байыпты әрі ымыралы шешімдерді іздеуге ұмтылуы қажет.

Қазақстан Православие Шіркеуінің дін қызметкерлері уағыздық және ағартушылық қызметінде мейірімділік мәдениетін және экологиялық даналықты — адамға Құдай сеніп тапсырған әлемге ұқыпты әрі жауапты қатынасты тәрбиелеу қажеттігіне үнемі назар аударады.

Сіздердің бейжай қарамайтын азаматтық ұстанымдарыңыз бен маңызды адамгершілік мәні бар мәселелерге көңіл бөлгендеріңіз үшін ризашылығымызды білдіреміз.

Қазақстан Митрополиттік округінің Қоғаммен байланыс бөлімінің басшысы протоиерей Александр Суворов