Қазақстан Митрополиттік округінің Басшысы Вятка және Слободск митрополиті Маркпен кездесті және Макарьедегі Троицкий храмында болды

5 маусым 2026 жыл.  Мәскеу және бүкіл Русь Патриархы Қасиетті Кириллдің батасымен Вятка жеріне сапармен келген Қазақстан Православие Шіркеуінің Басшысы, Астана және Қазақстан митрополиті Александр Вятка және Слободск митрополиті Маркпен кездесті.

Кездесуге қатысқандар: Митрополиттік округтің хатшысы, Қазақстанның еңбек сіңірген қайраткері, Ресей Федерациясының еңбек сіңірген өнер қайраткері, Орыс шіркеулік ән өнерін дамыту жөніндегі Патриарх кеңесінің мүшесі О.Н. Овчинников.

Митрополиттік округтің Басшысы әмірші Маркке Вятка жерінің храмдарын аралап, көне қасиетті орындар алдында дұға етуге мүмкіндік жасағаны үшін алғысын білдірді.

Вятка митрополиясының басқарушысы митрополит Александрға биылғы жылы өткен Бүкілресейлік Великорецк крест шеруі туралы айтып берді. Оның айтуынша, облыстық әкімшілік мәліметтері бойынша, 3 маусым күні Трифон ерлер монастырінің Успение соборынан қасиетті сапарға 31 мың қажы аттанған. Бұл өткен жылмен салыстырғанда 10 мың адамға артық.

Әңгіме барысында тараптар 6 маусым күні өтетін, 1383 жылы Мир Ликиясының архиепископы әрі ғажайыптар жасаушы әулие Николайдың керемет бейнесінің табылуына арналған Великая өзеніндегі салтанатты іс-шараларды талқылады.

Өз кезегінде қазақстандық иерарх бауырлас архипастырьға Қазақстан Православие Шіркеуінің өмірі туралы баяндады. Әмірші митрополит Қазақстанның көктегі қамқоршылары – Алматылық қасиетті азап шегушілер Серафим мен Феогносттың қасиетті жәдігерлерінің табылғанына 25 жыл толуына және олардың ерлігі мен азап шеккен жерінде, Ақсай шатқалында құрылған Серафим-Феогност ерлер монастырінің негізі қаланғанына 30 жыл толуына байланысты өтетін мерейтойлық іс-шаралар туралы айтты.

Митрополит Марк Вятка жерінің тумасы Олег Николаевич Овчинниковты Қазақстан Республикасының Президенті Қ.-Ж.К. Тоқаевтың Жарлығымен мәдениет саласындағы ерекше жетістіктері мен мемлекет алдындағы айрықша еңбегі үшін берілген «Қазақстанның еңбек сіңірген қайраткері» құрметті атағымен шын жүректен құттықтады.

Кездесу соңында архипастырьлар бір-біріне денсаулық пен шіркеулік қызметте Құдайдың жәрдемін тіледі. Храмда митрополитті басшы, діни қызметкер Владимир Путинцев қарсы алды.

Сол күні Митрополиттік округтің Басшысы Макарьедегі Өмір Беруші Қасиетті Үштік шіркеуіне де барды.

Өткен ғасырдың 80-жылдарының соңында болашақ Астана және Қазақстан митрополиті, сол кездегі протоиерей Александр Могилев бастамашыл приход мүшелерінің тобын ұйымдастырып, Киров облысындағы жабылған көптеген храмдардың бірін сенушілерге қайтару жолында белсенді еңбек етті. Макарьедегі Троицкий шіркеуі кеңестік билік тарапынан Киров қаласында ғана емес, бүкіл Ресей аумағында сенушілерге қайтарылған алғашқы храмдардың бірі болды.

Православие игілігі жолындағы көпжылдық қызметі үшін владыка митрополит Владимир Путинцевке Митрополиттік округтің жоғары наградасы – «Еңбек үшін» орденін табыс етті.

Иерарх Қасиетті Үштік шіркеуіне сый ретінде Құдайдың пайғамбары Илья иконасын тарту етті.

Троицкий храмының жанындағы зиратта митрополит Александр Православие жолындағы марқұм тақуа жандардың – митрофорлы протоиерей Серафим Исуповтың (†2021), монахиня Серафиманың (Гордеева; †1995), Калиса Васильевна Овчинникованың (†1998) және протодиакон Владимир Жуковтың (†2016) қабірлері басында дұға бағыштады.