Алматы қаласы приходтарының құрметті өкілі протоиерей Валерий Захаров Патриархтық кеуде крестін тағу құқығымен марапатталды

2026 жылғы 20 маусымда, Таганрогтық әділ Павелді еске алу күні, Астана және Қазақстан митрополиті Александр Алматы қаласындағы Никольский соборында Құдайлық Литургияны өткізді.

Биыл Оңтүстік астана храмдарының құрметті өкілі, Никольский соборының басшысы, митрофорлы протоиерей Валерий Захаров өзінің 75 жас мерейтойын атап өтуде.

Астана және Қазақстан митрополиті Александрдың ұсынысы бойынша Мәскеу және бүкіл Русь Патриархы Кирилл Қасиетті Шіркеу игілігі жолындағы көпжылдық қажырлы еңбегін және мерейтойлық туған күніне байланысты протоиерей Валерий Захаровты жоғары шіркеулік награда – Патриархтық кеуде крестін тағу құқығымен марапаттады.

Кіші кіреберіс кезінде митрополит әмірші Қасиетті Патриархтың Жарлығын орындау мақсатында құрметті өкіл әкеге Патриархтық кеуде крестін тақты.

Құрметті өкіл әкені жоғары Бірінші Иерархтық марапатпен құттықтай отырып, Митрополиттік округтің Басшысы атап айтқанда былай деді:

«Осыдан жарты ғасырдан астам уақыт бұрын сіз Мәсіх жолындағы пастырлық қызметке шақырылдыңыз. XX ғасырдың көрнекті иерархы – жарқын естелігі мәңгі сақталатын митрополит Питиримнің (Нечаев) қолынан қасиетті дін қызметін қабылдап, “тірі әрі шынайы Құдайдың” қызметшісі болдыңыз (1 Фес. 1:9).

Құдайдың шақыруына үн қатып, сіз өз өміріңізді Қасиетті Шіркеуге арнадыңыз. Ол қиын кезеңде Шіркеу түрлі шектеулер мен мемлекеттік бақылау жағдайында өзінің құтқарушы миссиясын атқарып келді. Сол жылдардың ауыртпалықтары мен қиындықтарын еңсеру үшін Иеміз сізге рухани және тәндік күш-қуат, батылдық пен даналық, төзім мен сабыр берді. Қуанышпен атап өткім келеді, бүгінде де бұрынғыдай сіз рухани беріктіктің, Құдайға адалдықтың және өз шақырылуыңызға деген берік сенімнің үлгісін көрсетіп келесіз. Иеміздің сөзі әрі қарай да таралып, дәріптелуі үшін (2 Фес. 3:1) аянбай еңбек етудесіз. Сіздің көпжылдық еңбектеріңіз жоғары шіркеулік және мемлекеттік наградалармен, түрлі марапаттармен атап өтілді. Мәскеу және бүкіл Русь Патриархы Кирилл Қасиетті Шіркеу игілігі жолындағы қажырлы еңбегіңізді бағалап, сізді Патриархтық кеуде крестін тағу құқығымен марапаттады».

Қазақстан Православие Шіркеуінің Басшысы  Валерий әкені көктегі қамқоршысының күнімен шын жүректен құттықтап, оған Иеміздің рақымын, рухани және тәндік күш-қуаттың нығаюын, ұзақ ғұмыр мен Мәсіх Шіркеуінің игілігі жолындағы еңбектеріне Құдайдың жәрдемін тіледі.