Құдай Анасының Донск иконасы мейрамында митрополит Александр Мәскеудегі Митрополиттік округі Өкілдігінің шіркеуінде Литургияны өткізді

2026 жылғы 1 қыркүйек – Ең Қасиетті Құдай Анасының Успение мейрамынан кейінгі кезең және Құдай Анасының Донск иконасының құрметіне арналған мереке.

Астана және Қазақстан митрополиті Александр Қазақстан Республикасындағы Орыс Православие Шіркеуінің Митрополия округі Өкілдігі - Мәскеу қаласындағы Патриархтық аулада орналасқан қасиетті азап шегушілер Вера, Надежда, Любовь және олардың анасы София атындағы шіркеуде Құдайлық Литургияны өткізді.

Митрополит Александрға қызмет еткендер: Алматы рухани семинариясының проректоры, теология ғылымдарының кандидаты, медицина ғылымдарының докторы, профессор игумен Агафангел (Гагуа); қасиетті азап шегушілер Вера, Надежда, Любовь және олардың анасы София атындағы шіркеудің кілтаршысы иеромонах Антоний (Дробязко); иеромонах Даниил (Макагон); иеромонах Викторин (Асеев); диакон Анатолий Леденев және диакон Роман Фролов.

Құлшылықта дұға еткендер: Қазақстанның еңбек сіңірген қайраткері, Ресей Федерациясының еңбек сіңірген өнер қайраткері О.Н. Овчинников – Қазақстан Митрополиттік округінің хатшысы әрі Патриархтың орыс шіркеулік ән айтуын дамыту жөніндегі кеңесінің мүшесі; Ресей Федерациясы Үкіметі төрағасы орынбасарының хатшылығы басшысының орынбасары Н.В. Паршикова; марқұм протоиерей Борис Присяжнюктің жары матушка Зинаида, оның туған-туыстары мен рухани шәкірттері; Өкілдік қызметкерлері мен шіркеу жамағаты.

Құлшылық кезіндегі әндерді Анна Рожнова жетекшілік ететін шіркеу хоры орындады.

Дұға бағыштау кезінде дүниеден озғанына он бес жыл толған марқұм настоятель протоиерей Борис Присяжнюктің рухына ерекше дұғалар оқылды.

Литургия Успение мейрамына арналған мадақтау дұғасымен аяқталды.

Құлшылық аяқталғаннан кейін митрополит Александр алтарь апсидасының жанындағы марқұм протоиерей Борис қабірінің басында мәңгі есте сақталатын әке-басшыға арналған панихидаға басшылық етті.

«Мәңгілік өмірге Құдайға деген сүйіспеншілік және жақынға деген сүйіспеншілік арқылы жететінімізді білеміз. Алайда Жаратқан Ие бізге тағы бір ұлы ақиқатты ашты: адамды Көк Патшалығына жеткізетін рухани ас – Мәсіхтің қасиетті әрі жан беретін құпиялары, яғни Құтқарушымыздың ең таза Тәні мен Қаны. Қасиетті Бірлесу құпиясына қатысу – ізгіліктің қайнар көзі әрі күнәдан арылудың пәрменді жолы. Иса Мәсіх Иеміз бізге: «Адам Ұлының тәнін жемесеңдер және Оның қанын ішпесеңдер, бойларыңда өмір болмайды» (Ин. 6:53), – деп ескертеді. Оразаны дұрыс ұстаудың, Құдай храмына жиі барудың, қасиетті құпияларға қатысудың сенуші адамға беретін рақымын, жұбанышы мен Жаратқан Иеден келетін көмегін сырттай бақылау арқылы сезіну мүмкін емес. Адамның жеке рухани тәжірибесін ақылдың күш-жігерімен, ерік-жігердің ширығуымен немесе сезімге назар аударумен алмастыру мүмкін емес. Өйткені: «Құдай Өзін сүйетіндерге не дайындағанын көз көрген жоқ, құлақ естіген жоқ, адам жүрегіне де келген емес» (1 Кор. 2:9).

«Дәм татып көріңдер, Жаратқан Иенің ізгілігін көріңдер!» (Пс. 39:9), – деп жыршы Давидтің сөзімен Мәсіхтің Шіркеуі бізді шынайы, ақиқат рухани өмірге келуге шақырады». Митрополит Александрдың уағызынан.