Қазақстан Митрополиттік округінің Басшысы Мәскеу Патриархатының Істері басқарушысы, Воскресенск митрополиті Григориймен кездесті

2026 жылғы 7 қыркүйек. Мәскеу.

Новоспасск монастырында Қазақстан Православ Шіркеуінің Басшысы, Астана және Қазақстан митрополиті Александрдың Мәскеу Патриархатының Іс басқарушысы, Воскресенск митрополиті Григориймен кездесуі өтті.

Митрополит Александр владыка Григорийге Қазақстандағы шіркеу өміріндегі негізгі оқиғалар туралы айтып, жуырда өткен халықаралық ауқымды жобаларға ерекше тоқталды. Олардың қатарында Қазақстанның барлық өңірлері мен шетелдерден бірнеше жүз жас өкілді біріктірген «Аспан. Адам. Дала» атты Еуразиялық православ жастар форумы, Алматы қасиетті шейіттері Серафим мен Феогностың жәдігерлері табылғанына 25 жыл толуына арналған волейбол турнирі, сондай-ақ «Жақыныңа қызмет ету» атты І Бүкілқазақстандық шіркеудің әлеуметтік-қайырымдылық қызметі съезі бар.

Иерарх Митрополиттік округ епархияларына жасаған сапарлары, дін қызметкерлерімен және мемлекеттік органдардың басшыларымен өткізген кездесулері туралы өз әсерлерімен бөлісті.

Әңгімелесушілер бір күн бұрын өткен Жалпымәскеулік крест шеруінің ұйымдастырылуы мен өткізілуіне жоғары баға берді. Оған Мәскеу және бүкіл Ресейдің Қасиетті Патриархы Кириллмен бірге архипастырлар, дін қызметкерлері, монахтар, қоғамдық ұйымдардың мүшелері және көптеген діндарлар қатысты.

Кездесу барысында өзара қызығушылық тудыратын кең ауқымды мәселелер бойынша пікір алмасу өтті. Әңгімелесушілер Қазақстандағы шіркеу мен мемлекет арасындағы қарым-қатынастар, конфессияаралық диалог мәселелерін талқылады. Сонымен қатар Митрополиттік округтегі рухани білім беру мен ағартушылықты дамыту тақырыптары сөз болды.

Әңгіме барысында митрополит Александр Митрополиттік округте 2027 жылы атап өтілетін тарихи күн — қазіргі Қазақстан мен Орталық Азия елдерінің аумағында Түркістан епархиясының құрылғанына 155 жыл толуына арналған мерекелік іс-шаралар жоспары туралы айтты.

Митрополиттік округ Басшысы әңгімелесушісіне бүкіл Қазақстан үшін рухани маңызы зор алдағы оқиға туралы да хабарлады. Атап айтқанда, биыл қыркүйек айында Мәскеу және бүкіл Ресейдің Қасиетті Патриархы Кириллдің батасымен Қазақстан Республикасының аумағына Тримифунттық әулие Спиридонның қасиетті жәдігерінің әкелінуі жоспарланып отыр.

Кездесуге қатысушылар қазіргі уақытта әулие Спиридонның қасиетті жәдігерлерінің Ресейде болуы діндарлар арасында ғана емес, Құдайға апарар өз жолын іздеген көптеген адамдардың да зор қызығушылығы мен жылы ықыласын тудырып отырғанын атап өтті.

Кездесу соңында архипастырлар бір-біріне денсаулық және шіркеу қызметіндегі еңбектеріне Құдайдың жәрдемін тіледі.