Алматыда «Пасхалық ән» атты халықаралық фестивалінің ашылуы өтті

15 мамыр 2026 жыл. Алматы. Астана және Қазақстан митрополиті Александрдың батасымен «Пасхалық ән» атты халықаралық православиелік хор музыкасы фестивалі өз жұмысын бастады.

Президенті В.М. Капсамун басқаратын «Eleos-Meirim» қоғамдық қорының қолдауымен өтіп жатқан ән өнері форумының ашылуы Оңтүстік астанадағы Иверско-Серафимовский монастырінің София соборында өтті.

Іс-шараның бастамашысы — Қазақстан Православие Шіркеуінің хатшысы, Ресей Федерациясының еңбек сіңірген өнер қайраткері, Қазақстан Митрополиттік округі хорының регенті, Орыс шіркеулік ән өнерін дамыту жөніндегі Патриархтық кеңестің мүшесі О.Н. Овчинников.

Фестиваль Мәскеу және бүкіл Русь Патриархы жанындағы Орыс шіркеулік ән өнерін дамыту жөніндегі Шіркеу-қоғамдық кеңестің қызметі аясында өткізілуде.

Музыкалық форумның ұйымдастырушысы — Қазақстан Православие Шіркеуінің мәдениет бөлімі (жетекшісі — Ресей Федерациясының еңбек сіңірген мәдениет қызметкері Л.Е. Горичева).

Фестивальдің мақсаттары мен міндеттері: ән мәдениеті саласындағы рухани мұра мен заманауи композиторлық шығармашылықты насихаттау; әншілік және рухани мәдениет дәстүрлерін жаңғыртуға жәрдемдесу; өсіп келе жатқан ұрпақтың рухани әрі эстетикалық тәрбиесіндегі ән мәдениетінің рөлін күшейту; өткен дәуірлер мен қазіргі заманның рухани шығармаларымен таныстыру; славян және қазақ халық ән өнерімен таныстыру; приходтық және зайырлы хор ұжымдарының көркемдік деңгейі мен орындаушылық шеберлігін арттыру; рухани, классикалық және халық музыкасын меңгеру мен орындау әдістемесіндегі жаңа бағыттарды айқындау; жалпы хор музыкасына деген қызығушылықты арттыру.

Форум аясында өтетін шеберлік сабақтары мен дәрістерге православиелік музыкалық өнердің көрнекті қайраткерлері келді: Мәскеу синодалдық хорының жетекшісі А.А. Пузаков; Мәскеу және бүкіл Русь Патриархы жанындағы Орыс шіркеулік ән өнерін дамыту жөніндегі Шіркеу-қоғамдық кеңестің жауапты хатшысы, Мәскеудегі Солнцево ауданындағы Радонеждік Сергий храмының «Артос» хорының регенті В.А. Волкова; Мәскеудегі Елохово Богоявление кафедралды соборының аға регенті А.К. Майоров.

Фестивальге Қазақстанның хор ұжымдары қатысуда: Қазақстан Митрополиттік округінің хоры (жетекшісі — Ресей Федерациясының еңбек сіңірген өнер қайраткері О.Н. Овчинников, хормейстері — В.В. Дударева); Астанадағы Успен кафедралды соборының хоры (жетекшісі — Ольга Варенцова); Көкшетау епархиясының хоры (жетекшісі — Мария Петрова); Қостанай епархиясының хоры (жетекшісі — Татьяна Жебрак); Өскемен епархиясының хоры (жетекшісі — Юлия Хохрякова); Орал епархиясының хоры (жетекшісі — Ольга Ворфоломеева); Павлодар епархиясының хоры (жетекшісі — Елена Юсупжанова); Петропавл епархиясының хоры (жетекшісі — Анна Оплетина); Шымкент епархиясының хоры (жетекшісі — Елена Алешина); Қарағанды епархиясының хоры (жетекшісі — Владимир Тесленко).

Іс-шара басталар алдында Астана епархиясының викарийі, Қаскелең епископы Геннадий Астана және Қазақстан митрополиті Александрдың фестиваль ұйымдастырушылары мен қатысушыларына арналған құттықтау сөзін оқып берді.

«Қазақстанның оңтүстік астанасы — Алматы қаласына Мәсіхтің Қасиетті Қайта Тірілуіне арналған үлкен музыкалық мерекеге қатысу үшін жиналған регенттер мен әншілерді шын жүректен құттықтаймын. Құтқарушының Пасхасы — бүкіл Шіркеу өмірінде де, әрбір православиелік христианның өмірінде де айрықша орын алатын ұлы мейрам. Себебі Мәсіхтің Қайта Тірілуі — біздің сеніміміздің іргетасы әрі Құдайдың адамзатқа деген шексіз сүйіспеншілігінің куәсі. Бүгінде елдер мен халықтар күрделі сынақтарды бастан кешіріп жатқан шақта, өнер бұрынғыдан да көбірек адамдарға жігер беріп, олардың рухын нығайтуға шақырылған. Біздің фестиваль — Мәскеу және бүкіл Русь Патриархы Кириллдің батасымен жүзеге асырылып жатқан үлкен шығармашылық әрі жасампаз еңбектің бір бөлігі. Бүгін ашылып отырған хорлар соборы Қазақстан Митрополиттік округінің өміріндегі маңызды мәдени оқиғаға айналып қана қоймай, православиелік музыкалық өнер саласында еңбек етіп жүрген жандарға тәжірибе алмасуға, теориялық және практикалық мәселелерді талқылауға, құдайтану ғылымдары мен православиелік құлшылық дәстүрлері саласында жаңа дүниелер ашуға мүмкіндік береді деп сенемін».

Матушка Варвара Волкова Орыс шіркеулік ән өнерін дамыту жөніндегі Шіркеу-қоғамдық кеңестің төрағасы, Тверь және Кашинск митрополиті Амвросийдің құттықтауын оқып берді.

Құттықтау хаттары жарияланғаннан кейін пленарлық отырыс ашылып, келесі баяндамалар ұсынылды:

– Алматы православиелік рухани семинариясының ректоры, құдайтану кандидаты протоиерей Евгений Иванов — «Қасиетті Пасха канонына құдайтанулық түсіндірме»;

– Мәскеудегі Елохово Богоявление кафедралды соборы хорының регенті Александр Константинович Майоров — «Ансамбльмен жұмыс — хор ұжымының кәсіби шеберлігінің негізі»;

– Мәскеу және бүкіл Русь Патриархы жанындағы Орыс шіркеулік ән өнерін дамыту жөніндегі Патриархтық Шіркеу-қоғамдық кеңестің жауапты хатшысы, Солнцеводағы Радонеждік Сергий храмының «Артос» хорының регенті матушка Варвара Волкова — «Глас әуендерін орындау техникасы. Өлшемсіз әндерді дирижерлеу тәсілдері».

Баяндамалардан кейін пікірталас өтіп, делегаттар спикерлермен сұхбаттасты.

Фестивальдің ашылуы аясында О.Н. Овчинников, А.К. Майоров және матушка Варвара Волкованың жетекшілігімен хор ұжымдарына арналған практикалық сабақтар өткізілді.

Музыкалық форумның жұмысы 17 мамырға дейін жалғасып, Алматыдағы Вознесенский кафедралды соборында Құдайлық Литургия кезінде фестиваль қатысушыларының біріккен хорының ән айтуымен аяқталады.