1 маусым 2026 жыл. Алматы. Вознесенский кафедралды соборы жанындағы приходтық ағарту орталығында православиелік богословие мен психология ғылымы тұрғысынан адам болмысын тұтас түсінуге арналған «Православиелік антропология және психологиялық ғылым» курсы аяқталды.
Астана және Қазақстан митрополиті Александрдың батасымен ұйымдастырылған курстың бастамашылары әрі ұйымдастырушылары – собордың кілтшісі, Қазақстан Митрополиттік округінің қоғаммен байланыс бөлімінің жетекшісі протоиерей Александр Суворов және собордың жексенбілік мектебінің рухани тәлімгері протоиерей Александр Иевлев.
Дәрістерді Вознесенский кафедралды соборында кеңесші-психолог ретінде қызмет атқаратын, көпжылдық тәжірибесі бар психолог Виктория Александровна Левина жүргізді.
Сабақтар барысында курстың негізгі тақырыптары қарастырылды: Құдай бейнесі және адамның қадір-қасиеті, тұлғалық дамудың онтологиясы, таланттар мен өмірлік шақыру, сондай-ақ адамның ішкі рухани зақымдануының себептерін түсінуге көмектесетін амартология ілімі.
Курс аясында адамның өзі туралы жалған немесе қорғаныш сипатындағы түсінігінің өз күнәларын, құмарлықтарын және жан дүниесіндегі терең бұрмалануларды көруіне қалай кедергі келтіретініне ерекше назар аударылды. Богословиялық және психологиялық көзқарастардың осындай үйлесімі қатысушыларға адам табиғатын тереңірек түсінуге, сондай-ақ рухани кемелдену жолындағы тәубенің, сергектіктің және ішкі шынайылықтың маңызын ұғынуға мүмкіндік берді.
Курс аяқталғаннан кейін сабақтарға тұрақты қатысып, ынта-жігері мен жауапкершілігін көрсеткен және оқу материалын жақсы меңгерген тыңдаушыларға сертификаттар табысталды. Құжаттарды түлектерге протоиерей Александр Суворов пен протоиерей Александр Иевлев тапсырды.
Басты бет
Пікір жазу үшін жүйеге кіріңіз немесе тіркеліңіз!
Пікіріңіз сәтті қосылды және оны қазір сайт әкімшілігі қарастырып жатыр