Қазақстан Митрополиттік округі Басшысының Алматы қаласының әкімі Д.А. Сатыбалдымен кездесуі өтті

13 тамыз 2026 жыл. Алматы. Қала әкімдігінде Қазақстан Православие Шіркеуінің Басшысы, Астана және Қазақстан митрополиті Александрдың Оңтүстік астананың әкімі Дархан Амангелдіұлы Сатыбалдымен кездесуі өтті.

Атқарушы билік басшысы мен архипастыр Оңтүстік астананың қоғамдық өміріндегі өзекті мәселелерді талқылады. Атап айтқанда, 2026 жылы конституциялық референдумда қабылданған жаңа Конституцияға сәйкес құрылған Құрылтайға алдағы сайлаудың маңыздылығы туралы сөз болды. Әкімнің айтуынша, елде жүзеге асырылып жатқан саяси реформалар демократиялық институттарды дамытуға, заң шығару үдерісін оңтайландыруға және артық бюрократиялық рәсімдерді жоюға ықпал етеді.

Кездесу барысында мегаполистің мәдени-туристік кластерін дамыту және маңызды діни нысандарды танымал туристік бағыттар бағдарламаларына енгізу мәселелері де сөз болды. Дархан Амангелдіұлының айтуынша, қала мен агломерацияның туристік әлеуетін ашу жұмыстары жалғасуда. Осыған байланысты биыл Шымбұлақты жаңғырту және 2029 жылғы қысқы Азия ойындарына дайындық жұмыстары басталды.

Митрополит Александр Д.А. Сатыбалдыға Алматы епархиясының өмірі туралы айтып, биылғы жазда жүзеге асырылған халықаралық ауқымды жобалар – «Аспан. Адам. Дала» Еуразиялық православ жастар форумы мен Алматыдағы қасиетті шейіттер Серафим мен Феогностың жәдігерлерінің табылғанына 25 жыл толуына арналған волейбол турнирі туралы хабарлады. Бұл іс-шаралар Қазақстанның барлық облыстары мен шетелдерден келген бірнеше жүздеген жастың басын қосты.

Иерарх атқарушы билік басшысына Қазақстан Республикасының Президенті Қасым-Жомарт Кемелұлы Тоқаевтың тапсырмасы бойынша Алматыдағы Вознесенский кафедралды соборын ЮНЕСКО-ның Дүниежүзілік мұралар тізіміне енгізу бағытында жүргізіліп жатқан жұмыстар туралы хабардар етті.

Кездесуге қатысушылардың пікірінше, Қазақстанның «Рухани жаңғыру» президенттік бағдарламасының жалпыұлттық маңызы бар 100 қасиетті нысанының тізіміне енген Вознесенский кафедралды соборы көптеген қажылық етушілер мен туристерді тартатын орын болып табылады. Оңтүстік астананың рухани жауһарының тарихы мен қазіргі тыныс-тіршілігімен мемлекет және дипломатиялық миссиялар басшылары, корольдік әулет мүшелері, министрлер, әлемдік діндер көшбасшылары мен көрнекті ғалымдар сияқты жоғары мәртебелі қонақтар тұрақты түрде танысып келеді.

Кездесуге қатысушылар өзара қызығушылық тудыратын кең ауқымды мәселелерді талқылады. Қала әкімдігі мен Алматы епархиясының қала тұрғындарының рухани және адамгершілік негіздерін нығайту, мәдени және тарихи мұраны сақтау бағытындағы ынтымақтастығы туралы сөз болды.

Республиканың жетекші дәстүрлі конфессиялары – ханафи мазхабындағы ислам мен православие христиандығы және атқарушы билік арасындағы сындарлы диалог мегаполистегі дінаралық татулық пен этносаралық келісімді сақтаудың маңызды шарты болып қала беретіні атап өтілді. Бұл өз кезегінде әлеуметтік-экономикалық дамудың маңызды факторларының бірі болып табылады.

Жылы әрі достық жағдайда өткен кездесудің соңында митрополит Александр мен Дархан Амангелдіұлы бір-біріне зор денсаулық пен еңбектеріне табыс тіледі.