Қазақстанның Оңтүстік астанасындағы Никольский соборының Православие Шіркеуіне қайтарылғанының 80 жылдығына орай Патриархтың құттықтауы

Мәскеу және бүкіл Русь Патриархы Кириллдің Алматы қаласындағы Мир Ликия архиепископы, әулие әрі ғажайыптар жасаушы Николайдың атына арналған собордың Орыс Православие Шіркеуіне қайтарылғанына 80 жыл толуына орай жолдаған құттықтауы:

Аса мәртебелі

АСТАНА ЖӘНЕ ҚАЗАҚСТАН МИТРОПОЛИТІ,

Қазақстан Республикасындағы

Орыс Православие Шіркеуінің

Митрополиттік округінің Басшысы

АЛЕКСАНДРҒА

Алматы қаласындағы Никольский соборының

Орыс Православие Шіркеуіне қайтарылғанының

80 жылдығына арналған мерекеге қатысушыларға

Аса құрметті Жоғары мәртебелі!

Иеміз Қүдай жолындағы сүйікті архипастырьлар,

ардақты әкелер, қымбатты бауырлар мен әпке-қарындастар!

МӘСІХ ТІРІЛДІ!

Осы өмірді дәріптейтін Пасхалық ізгі хабар сөздерімен баршаңызды шын жүректен құттықтаймын және Қазақстанның Оңтүстік астанасындағы Никольский соборының Орыс Православие Шіркеуіне қайтарылғанының 80 жылдығымен құттықтаймын. Бұл атаулы күн Алматыдағы православие сенушілері үшін де, Қазақстан Республикасындағы Митрополиттік округтің барлық діндарлары үшін де маңызды оқиға екені сөзсіз.

Маған 2010 жылы өткен ғасырда көптеген православие қасиетті орындарының тағдырын бөліскен осы тамаша храмға келудің сәті түсті: билік шешімімен ол жабылып, он жыл бойы құдайға құлшылық етуге қолжетімсіз болып қалды.

Қасиетті діндар митрополит Николайдың (Могилевский) еңбегінің арқасында 1946 жылы Никольский храмы сенушілерге қайтарылып, жарты ғасыр бойы Алматы епархиясының кафедралық соборы, Қазақстанның басты храмы болды. Мұнда құлшынысты дін қызметкерлері мен прихожандардан тұратын берік қауым қалыптасты. Олардың көпшілігі Шіркеу үшін қиын кезеңдерде Мәсіхтің Айқышқа шегеленіп, қайта тірілгені туралы замандастары алдында куәлік етуге күш пен батылдық тапты. Қазіргі таңда қасиетті мүрдесі осы собор күмбездерінің астында тыныстап жатқан қасиетті діндар митрополит Николайдан бөлек, мұнда тақуалық жолындағы подвижниктер мен сенім мойындаушылары – митрополит Иосиф (Чернов), архиепископ Ермоген (Голубев) және ХХ ғасырдың басқа да көрнекті иерархтары мен пастырьлары қызмет етті.

Бүгінде Никольский соборы Қазақстан жеріндегі Православиенің жаңғыруының нышандарының бірі әрі маңызды рухани орталық болып табылады. Мұнда ауқымды ағартушылық және әлеуметтік жұмыстар жүргізіліп жатқаны, балалар мен ересектерге арналған жексенбілік мектептердің жұмыс істейтіні, әлеуметтік қызметтің жүзеге асырылатыны, мейірімділік сіңлілері қауымының ұйымдастырылғаны қуантады. Бұл көне храм алдағы уақытта да құтқарылуды іздегендер, рухани жұбаныш пен қолдау күткендер үшін белсенді игі еңбектер мен ынталы дұғалардың орны болып қала береді деп үміттенемін.

«Бізді Мәсіх Иса арқылы Өзінің мәңгілік даңқына шақырған барша рақымның Құдайы Өзі сендерді кемелдендіріп, бекітіп, нығайтып, мызғымас етсін. Оған мәңгілік даңқ пен билік болсын. Әмин» (1 Пет. 5:10–11).

Қайта тірілген Иеміз Құдай жолындағы сүйіспеншілікпен,

+ КИРИЛЛ, МӘСКЕУ ЖӘНЕ БҮКІЛ РУСЬ ПАТРИАРХЫ