2026 жылдың қарсаңындағы Астана және Қазақстан митрополиті Александрдың үндеуі

Қымбатты бауырлар мен әпке-қарындастар!

Адамзат тағы бір тарихи межеден аттап өтуде - тағы бір жыл тарихтың еншісіне айналып, азаматтық жыл санау бойынша жаңа жыл басталуда. Уақыттың, күндер мен жылдардың ауысуы (Быт. 1:14) бізге болмыстың шапшаң әрі тоқтаусыз ағымын, мәңгілік табалдырығына жақындап келе жатқанымызды еске салады. Күнтізбедегі күндердің ауысуын бақылай отырып, біз апостол сөзіне сай, уақытты қадірлей білетін дана адамдардай өмір сүруді үйренудеміз (Еф. 5:15).

Адам өмірін Шіркеудің әкелері мен ұстаздары поэтикалық түрде кітап жазу үдерісімен салыстырады. Ондағы әрбір жаңа күн — жаңа бет, әрбір жаңа жыл — жаңа тарау; ал сияның орнына — сөздер мен істер. Адамдардың істері жазылған ашық кітаптар бейнесі (Дан. 7:10; Откр. 20:12) Соңғы әрі Қорқынышты Сот жайлы пайғамбарлық сипаттамаларда кездеседі. Адамдар өмірлерінің Авторы, Құдайдың алдына шығып, сол кітапта жазылғанды: иә сүйіспеншілік істерінің нұрлы жолдарын, иә күнәнің қараңғы беттерін жария етеді. Қасиетті Августин сол сәтте Құдайдың күшімен «әр адамның барлық істері — жақсысы да, жаманы да — жадта қайта жаңғырып, таңғаларлық айқындықпен сананың көз алдында тұрады; сондықтан да  білім ар-ұжданды не айыптайды, не ақтайды» деп түсіндіреді. Жай қолжазбаны түзетуге, қате сөзді сызып тастауға, бүлінген бетті ауыстыруға болады, ал өмір кітабымен бәрі әлдеқайда күрделі. Осы кітаптың жаңа, таза бетін ашқанда, қасиетті Феофан Затворниктің ескертуін есте сақтайық: «Тек жақын уақыттағы істер мен жасыру мүмкін болмай қалғандары ғана есте қалады деп ойламаңдар; қалғандарының бәрі де жоғалып кетпейді. Әрбір ой, әрбір сезім, әрбір сөз бен іс, әрбір көзқарас — ең ұсақ әрекетке дейін — өз ізін қалдырады».

Күндердің бастауы да, өмірдің соңы да жоқ Жаратушы үшін (Евр. 7:3) өткен де, болашақ та жоқ — Ол уақыт пен кеңістіктен тыс. Ал уақыт шеңберінде өмір сүретін біздер үшін өткен қайта оралмайды, болашақ беймәлім, тек қазіргі сәт қана Құдайдың бізге берген сыйы. Бүгінгі күнді игілікпен әрі парасаттылықпен пайдалана отырып, біз болашаққа игі әсер ете аламыз, өйткені елшінің сөзімен айтқанда: адам не ексе, соны орады (Гал. 6:7). Інжіл бойынша өмір сүру адамды үмітпен қанаттандырып қана қоймай, Құдайдың мейірімінің есіктерін ашады әрі шынайы тәубеге жауап ретінде өткеннің қателіктерін өшіреді. Мұны Жаратқан Иенің Өзі куәландырады: «Мен Өзім үшін сенің жасағандарыңды өшіремін және күнәларыңды еске алмаймын» (Ис. 43:25). Дана Соломон былай дейді: «Құдай өткенді қайта шақырады» деді (Еккл. 3:15). Яғни, Оған сенетін әрбір жанға Жаратушы бәрін таза беттен бастау мүмкіндігін береді.

Бүгінгі ой-толғамдарға үндес көне бір әңгіме-тәмсіл бар. Бірде құдіретті әрі қаһарлы патша қарт данышпанға үш сұрақ қояды: «Дүниедегі ең маңызды адам кім?», «Өмірдегі ең маңызды сәт қандай?» және «Адам жасай алатын ең басты іс қандай?» Осы сұрақтарға жауап табу үшін данышпан түрлі елдерді аралап, көне жазбаларды іздеп, атақты ғалымдар мен философтарға жүгінеді. Бірақ жауап таба алмай, патшаға қайтар жолда жазадан қорқып келе жатып, далада қаз бағып жүрген бір ауыл қызын кездестіреді. Қыз оның мұңайған жүзін көріп, себебін сұрайды. Данышпан бәрін айтып бергенде, қыз жүрек тазалығымен былай дейді: «Ең маңызды уақыт — дәл қазіргі сәт. Өйткені “кеше” өтті, ал “ертең” әлі келген жоқ. Ең маңызды адам — дәл қазір қасыңда тұрған адам. Ал ең басты іс — осы сәтте сол адам үшін қолдан келген жақсылықты жасау». Ендеше, өмір мен уақыт беріліп тұрған кезде, Жаратқан Ие күш пен мүмкіндік нәсіп етіп тұрғанда, жақындарымыз үшін, жанымыздағылар үшін игі істер жасауға асығайық.

Қалыптасқан игі дәстүр бойынша көптеген православ христиандар Жаңа жылды қарбалас пен шудан алыс, қасиетті храмдарда, Құдайлық Литургиялар мен дұғаларға қатысып қарсы алады. Біз де Жаңа Жылдың басталуын Қансіз Құрбандықты — қасиетті Евхаристияны — «бүкіл әлемнің тыныштығы үшін», туған Қазақстанымыздың игілігі үшін, Жаратқан Иенің бізге мейірімін көрсетіп, бейбітшілік пен бақ-береке беруі үшін ұсыну арқылы қасиеттендіреміз. Жаратқан Иенің бізге жасаған барлық игіліктері үшін шын жүректен әрі бар ойымызбен Оған алғыс айтайық. Алғыс айту — адам болмысының көркем қасиеті, ол адамдар арасындағы қарым-қатынаста жоғары бағаланады, ал Құдаймен қарым-қатынаста тіпті де аса қажет. Апостол бізді осыған шақырады: «Барлық жағдайда Құдайға алғыс айтыңдар, өйткені Мәсіх Исада Құдайдың сендерге деген еркі осы» (1 Фес. 5:18).

Азаматтық Жаңа Жылдан кейін шіркеу күнтізбесінің қасиетті күндері — Христостың Рождествосының алдындағы дайындық кезеңі басталады. Бұл уақытта ойымыз бен сезіміміз дүниеге Құтқарушының келу құпиясына бағытталуы тиіс. Осы посттың соңғы кезеңін рухани тазалықта, ашу мен күйбеңнен аулақ, дұғада, тәубеде, қайырымдылық істерінде және храмдарға баруда өткізуге тырысайық.

«Әке Құдайдан және Иса Мәсіхтен шындық пен сүйіспеншілікте рақым, мейірім және бейбітшілік сендермен бірге болсын!» (1 Фес. 1:3).