Құрметті қауым !
Қадірлі әкелер, ардақты бауырлар мен әпке-қарындастар!
Алматы православиелік рухани семинариясының ректоры мен әкімшілігін, профессор-оқытушылар құрамын және білім алушыларын кезекті оқу жылының аяқталуымен, ал түлектерді біліктілік жұмыстарын сәтті қорғап, диплом алуымен шын жүректен құттықтаймын.
Рухани мектебіміздің жылдық қорытынды кешіне қатысу мен үшін әрдайым зор қуаныш. Дәстүр бойынша дәл осы жиында аяқталған оқу жылының нәтижелері қорытындыланып, алдағы кезеңнің міндеттері айқындалады.
Шіркеу Басшысының бұл жиынға қатысуы тек салтанатты рәсімге көрсетілген құрмет қана емес, сонымен қатар рухани білім берудің шіркеу басшылығы үшін аса маңызды басымдықтардың бірі екенін білдіреді. Өйткені рухани білімнің деңгейі мен семинария дайындайтын түлектердің сапасына қарай еліміздегі шіркеу өмірінің алдағы ондаған жылдардағы сипаты айқындалатыны сөзсіз.
Бірқатар қиындықтарға қарамастан, Алматы семинариясы өз қызметін жалғастырып келеді. Құдай қаласа, жанашыр азаматтардың қолдауымен ол тек өмір сүріп қана қоймай, әрі қарай дамиды. Бізді – шіркеу басшылығын, оқытушылар құрамын және қайырымды жандарды бір мақсат біріктіреді: Қазақстан Православие Шіркеуінің басты рухани оқу орны өзінің жоғары мәртебесіне тек оқу жоспарлары мен бағдарламалары бойынша ғана емес, студенттердің нақты білім деңгейі мен практикалық дағдылары бойынша да сай болуы тиіс.
Рухани білім беру – шіркеу өмірінің маңызды көріністерінің бірі ретінде қалыптасқан тарихи дәстүр. Сонымен бірге ол конфессияаралық және мәдениетаралық өзара түсіністік пен байланыстарды нығайтуға бағытталған қоғамдық құбылыс болып табылады. Алдымызға қойған міндеттерді жүзеге асыруға көмектесетін маңызды факторлардың бірі – пәнаралық ынтымақтастық, яғни рухани және зайырлы жоғары оқу орындарымен, Қазақстан мен шетелдегі теология, тарих, мәдениеттану және философия салаларының мамандарымен өзара әрекеттестік орнату.
Сонымен қатар бүкіл оқу үдерісі қасиетті әкелердің киелі дәстүріне негізделуі тиіс. Теологиялық және зайырлы ғылымдарды меңгеру литургиялық тәжірибе мен аскетикалық өмірден ажырамауы қажет. Әсіресе Қасиетті Жазбаны терең әрі жан-жақты зерттеуге ерекше көңіл бөлінуі керек.
Семинария – ерекше шіркеулік қауымдастық, үлкен отбасы. Ол әкімшілік пен оқытушыларды, архипастырьларды, дін қызметкерлерін және зайырлы мамандарды біріктіреді. Бұл – күндізгі және сырттай бөлімдерде білім алып жатқан студенттердің туған шаңырағы. Семинария түлектерінің бәрі де осы қауымдастықтың ажырамас мүшелері болып қала береді.
Оқу үдерісінің аяқталуы – әр адамның өміріндегі маңызды әрі жарқын белес. Артта дәрістер мен семинарлар, ғылыми әдебиеттермен жүргізілген тынымсыз еңбек, сынақтар мен емтихандарға дайындықтың жауапты кезеңдері қалды. Кейін көпшілігіңіз бұл уақытты алғыс сезімімен, рухани қалыптасу мен зияткерлік дамудың жарқын кезеңі ретінде еске алатын боласыздар. Игерген білімдеріңізді, қабілеттеріңіз бен дағдыларыңызды адамдар игілігіне жұмсап, «Иеміз Иса Мәсіхтің есімі сендер арқылы мадақталып, сендер де Ол арқылы дәріптелулерің үшін» (2 Фес. 1:12) қызмет етулеріңіз қажет.
Менің рухани тәлімгерлерімнің бірі – 1989 жылы архипастырлық тағайындалуыма жетекшілік еткен марқұм Қасиетті митрополит Владимирдің (Сабодан) семинарияға түсуге деген жастық шағындағы арманы туралы айтқан сөздері есімде. «Қоңырау құйылған кезде, – дейтін ол, – балқытылған металға күміс қосылады. Күміс неғұрлым көп болса, қоңыраудың үні соғұрлым таза, қуатты әрі әуезді болады. Мен де жан дүниемнің үні өмір бойы таза әрі үйлесімді болғанын қаладым. Ол үшін Інжіл ақиқаты мен сүйіспеншілігінің нұрынан тұратын “асыл металды” жинауым қажет еді. Мен осы “асыл металды” рухани семинариядан табамын деп үміттендім».
Шынында да, рухани оқу орындарында берілетін білім – Мәсіх ақиқатын уағыздау үшін қажетті негізгі білім қоры.
Ол Шіркеудің тарих барысында қалай әрекет еткенін, тәртіптік мәселелерді қалай шешкенін, сенім тазалығын қалай қорғағанын, Киелі Рухтың көмегімен барлық қиындықтар мен сынақтарды қалай еңсергенін түсінуге мүмкіндік береді. Дін қызметкерінің осы мол рухани және тарихи мұрадан бейхабар болуы мүмкін емес әрі жол беруге болмайды. Иеміз Өзінің шәкірттері мен елшілеріне жердің «тұзы» мен «жарығы» болуды (Мф. 5:13–14), адамдарды оятып, оларды күнә қараңғылығынан Құдай ақиқатының, сүйіспеншілігі мен тыныштығының Патшалығына шақыруды өсиет етті (Мф. 28:19–20; Мк. 16:15). Мәсіхтің елшілерге айтқан бұл сөздері мен өсиеттері бүгінгі және болашақтағы шіркеу қызметкерлері ретінде сіздерге де толық қатысты. Өйткені әрбір пастырьдің өмірі мен қызметінің басты мақсаты – Інжіл өсиеттерін орындау арқылы жеке құтқарылуға жету және Құдайдың өзі оның қамқорлығына тапсырған адамдарды құтқарылу жолына бастау.
Барлығымыз да Иеміздің Өзін шынайы сүйетіндердің бәріне сыйлайтын мәңгілік өмір үшін мол әрі игі жеміс беруіміз қажет (2 Тим. 4:8).
Дін қызметкерінің қызметіндегі берекелі табыстың кепілі – еңбекқорлықпен, төзімділікпен және табандылықпен ұштасқан Мәсіхке деген сүйіспеншілік. Ежелгі патерикте мынадай тағылымды оқиға баяндалады. Бір жас дін қызметкері қарт рухани ұстазға келіп: – Әке, адамдарға уағыз айтудың мәнін көрмеймін. Олар мені тыңдамайды, жақсы жаққа өзгермейді, – деп налиды. Сонда қария оған ескі, кірлеген құмыраны ұсынып: – Бұлаққа барып, осыған су толтырып әкел, – дейді. Шәкірті суды әкелгенде, құмыра түбінде жиналған ескі тұнбаның әсерінен су лайланып шығады. Сонда абба суды төгіп тастап, бәрін қайтадан жасауды бұйырады. Осылайша бұл әрекет қайта-қайта жалғаса береді. Ақырында шаршаған дін қызметкері мөп-мөлдір, тап-таза су әкеледі. Өйткені үздіксіз шайылудың арқасында құмыра жаңадай тазарып кеткен еді.
– Қарашы, – дейді қария, – тіпті мөлдір бұлақ суының өзі бұл құмыраны бірден тазарта алмады. Ол үшін уақыт та, еңбек те, төзім де қажет болды. Дәл сол сияқты сен айтқан Құдай сөзі де күнәға бой алдырған жанға әсер етеді. Адам бір ғана әңгімеден өзгеріп кетпейді. Бірақ егер сен оған қайта-қайта, сабырмен Інжілдің тірі суын құя берсең, оның жүрегі тазарады, ал ақыл-ойы жаңарады.
Алматы рухани семинариясындағы кезекті оқу жылының қорытындысын шығара отырып, осы білім ордасында жанқиярлықпен еңбек етіп жүрген, оқу-тәрбие үдерісін ұйымдастырып, жүзеге асырып отырған, ғылыми және шаруашылық қызметті жүргізіп жүрген барша жанға шынайы алғысымды білдіремін.
Сондай-ақ рухани мектебіміздің дамуы мен нығаюына жан-жақты қолдау көрсетіп келе жатқан «Eleos-Meirim» қоғамдық қорының президенті В.М. Капсамун бастаған ұжымға ерекше ризашылығымды білдіремін.
Қымбатты студенттер мен түлектер, сіздерге ақ жол тілей отырып, көне даналық сөзді еске салғым келеді: «Ақиқатты білген адам бақытты; оған ұмтылған адам екі есе бақытты; ал ақиқатпен өмір сүретін адам үш есе бақытты». Елші өсиет еткендей: «Құлшыныстан таймаңдар, рухтарың жалындап тұрсын, Жаратқан Иеге қызмет етіңдер; үмітпен қуаныңдар, қайғы-қасіретте төзімді болыңдар, дұғада тұрақты болыңдар.» (Рим. 12:11–13). Ең бастысы – өз өмірлеріңді өзгелердің игілігіне және Мәсіх Шіркеуіне қызмет етуге арнауды өмірлік қағида етіңдер.
Баршамызға Иеміздің рақымы, Қасиетті Құдай Ананың шапағаты және Қазақстанның жаңа азап шегушілері мен діндарларының дұғалы қолдауы әрдайым серік болсын.
Басты бет
Пікір жазу үшін жүйеге кіріңіз немесе тіркеліңіз!
Пікіріңіз сәтті қосылды және оны қазір сайт әкімшілігі қарастырып жатыр