Митрополиттік округ Басшысының Қазақстан халқының бірлігі күні мерекесімен құттықтауы

1 мамыр 2025 жыл – Қазақстан халқының бірлігі күні. Қазақстан Православие Шіркеуінің Басшысы Астана және Қазақстан митрополиті Александр ел тұрғындарын мерекемен құттықтайды: Елімізді мекендеген халықтың бірлігін, достығы мен ынтымағын білдіретін көктемнің бұл жарқын мерекесі Қазақстандағы ең айтулы мерекелердің біріне айналды.

Ғасырлар бойы Ұлы даланың ұлан-ғайыр кеңістігінде түрлі этностар мен діндер өкілдерінің тату-тәтті өмір сүру дәстүрлері сақталған. Ал қазіргі таңда еліміз конфессияаралық және ұлтаралық келісімнің үлгісін көрсетуді жалғастыруда.

Қазақстан Президенті Қасым-Жомарт Кемелұлы Тоқаев өз жолдауларының бірінде былай деді: «Егемен еліміздегі барлық этникалық топ өкілдері біртұтас Қазақстан халқын құрайды. Біз достық пен ынтымақтың, татулық пен тұрақтылықтың арқасында зор жетістікке жеттік. Бейбітшілік пен қоғамдық келісім – баға жетпес байлығымыз. Бұл құндылықтар жаңа Қазақстанның стратегиялық бағыт-бағдарының өзегіне айналды».

Православие шіркеуі Республиканың тарихи дамуы мен мәдени мұрасына зор үлес қосқан дәстүрлі Исламмен бірге ортақ үйіміз – құтты Қазақстандағы бейбітшілік пен берекенің сақталуы мен нығаюына ықпал ете отырып, өзінің игі миссиясын жалғастыруда.

Осы мерекелік күні барша қазақстандықтарға зор денсаулық және жұмыстарына табыс, бейбітшілік пен бақ-береке тілеймін.

Митрополиттік округ Басшысы Қазақстан халқының бірлігі күнімен ел Президентіне, үкімет мүшелеріне, қалалар мен облыстардың әкімдеріне, парламент депутаттарына құттықтау жолдады.