Митрополиттік округтің Басшысы Петропавл қаласындағы ең көне храмында болды

29 сәуір 2026 жыл. Петропавл. Петропавл епархиясына архипастырлық сапармен келген Астана және Қазақстан митрополиті Александр Солтүстік Қазақстанның орталығындағы ең көне храм – бірінші дәрежелі апостолдар Петр мен Павел атындағы соборға барды.

Митрополиттік округтің Басшысымен бірге Петропавл епархиясының басты храмына «Eleos-Meirim» қоғамдық қорының президенті В.М. Капсамун да келді.

Қазақстан Православие Шіркеуінің Басшысын сүйемелдегендер: Көкшетау және Ақмола архиепископы Варсонофий; Петропавл және Булаево архиепископы Владимир; Петропавл епархиясының хатшысы протоиерей Сергий Первушин; Митрополиттік округ Басшысының әкімшілік хатшылығының жетекшісі иерей Георгий Сидоров.

Әмірші митрополитті және қонақтарды Петропавл соборының басшысы протоиерей Сергий Снопков қарсы алды.

Келгеннен кейін Жоғары мәртебелі митрополит иерархтармен және дін қызметкерлерімен бірге Қасиетті Христостың Қайта Тірілуіне арналған дұғасын  жасады.

Митрополит Александр Қазақстан Митрополиттік округінің архипастырлары, пастырлары, монашелері мен миряндары үшін, сондай-ақ Қазақстан жеріндегі бейбітшілік пен игілік, Президент, билік өкілдері, әскер және халық үшін ерекше дұға етті.

Құлшылық соңында митрополит Александр жиналғандармен «Христос воскресе!» деп амандасып, жиналғандарды қасиетті сумен себелеп, приход белсенділерімен әңгімелесті.

Одан кейін Митрополиттік округтің Басшысы архиепископ Владимир мен протоиерей Сергий Снопковтың сүйемелдеуімен 2024 жылдың көктеміндегі ауқымды су тасқынынан зардап шеккен, қазіргі уақытта қалпына келтіріліп жатқан соборды аралап көрді. Петропавл епархиясының басқарушысы қонақтарға бүгінгі күні шіркеудің қабырғалары, күмбездері мен іргетасы нығайтылғанын, едендері жөнделгенін, шатыры ауыстырылғанын және алтарьдың қалпына келтірілгенін баяндады. Сондай-ақ иерарх жаз мезгілінде собордың сыртқы әрлеу жұмыстарын жүргізу жоспарымен бөлісті.

Қазақстан Православие Шіркеуінің Басшысы атқарылған жұмыстарға жоғары баға беріп, Петропавл епархиясының ең көне храмын қалпына келтіруге белсене қатысып жатқан барлық жандарға алғысын білдірді. Соборға сапар соңында митрополит Александр мен архипастырлар храмның қасиетті жәдігерлеріне тағзым етіп, басшыға Солтүстік Приишимье жерінде Православие игілігі жолындағы еңбектеріне Құдайдың көмегін тіледі.

Храм XIX ғасырдың бірінші жартысында салынған. Қазан төңкерісінен кейін ол тапталып, ішінара қираған. Тек 1946 жылы ғана қайтадан сенушілерге қайтарылды. Собор қабырғасына Алматы және Қазақстан митрополиті Иосифке (Чернов) арналған ескерткіш тақта орнатылған. Онда архипастырдың бейнесі бейнеленіп, мынадай жазу жазылған: «Петропавл қаласындағы апостолдар Петр мен Павел атындағы соборда 1956–1960 жылдары ХХ ғасырдағы Орыс Православие Шіркеуінің көрнекті қайраткері, Алматы және Қазақстан митрополиті Иосиф (Чернов) қызмет етті». Митрополит Иосиф Петропавлға 1956 жылы жер аударудан босатылғаннан кейін, апостолдар Петр мен Павел мерекесінің қарсаңында келген. Оның алғашқы құлшылығы дәл осы мерекеде өтті. 1957 жылғы 18 наурызда дербес Петропавл епархиясы құрылып, әмірші Иосиф оған Петропавл және Қостанай титулымен басқарушы болып тағайындалды. Жаңа епархия құрамына бес облыс кірді: Петропавл, Ақмола, Қарағанды, Көкшетау және Қостанай облыстары. 2024 жылдың көктемінде собор бұрын-соңды болмаған ауқымдағы су тасқынынан зардап шекті. 2024 жылғы 29 желтоқсанда Петропавл және Булаево архиепископы Владимир соборды ұлы қасиеттеу рәсімін өткізді. Қазіргі уақытта қайырымдылық жасаушылар мен сенушілердің ерікті қаражаттары есебінен жөндеу жұмыстары жалғасуда.