Алматы епархиясының өкілдері жасанды интеллектіні дамыту мен қолданудың этикалық, құқықтық және әлеуметтік аспектілеріне арналған халықаралық ғылыми-тәжірибелік конференцияға қатысты

16–17 сәуірде 2026 жылы Алматы қаласында Caspian University негізінде жасанды интеллектіні дамыту мен қолданудың этикалық, құқықтық және әлеуметтік аспектілеріне арналған халықаралық ғылыми-тәжірибелік конференциясы өтті.

Форум жұмысына Оңтүстік астанадағы Вознесенский кафедралды соборының кілтшісі, Митрополиттік округтің қоғаммен байланыс бөлімінің жетекшісі протоиерей Александр Суворов және Алматы Православие рухани семинариясының бітіруші курс студенті Ярослав Макарчук қатысты.

Протоиерей Александр Суворов конференцияның ресми ашылуында құттықтау сөз сөйледі. Өз сөзінде пастырь жасанды интеллект технологияларын дамытуға жауапкершілікпен қараудың қажеттігін атап өтіп, цифрлық трансформация жағдайында адам тұлғасын, еркіндігін және жауапкершілігін сақтау айрықша маңызға ие екенін айтты.

Жасанды интеллектіні қолданудың этикалық, құқықтық және гуманитарлық аспектілеріне арналған сараптамалық секция аясында Александр әке «Әлеуметтік желілерде ЖИ арқылы жасалған “жасанды уағыздаушылардың” таралуының этикалық, құқықтық және әлеуметтік аспектілері: рухани контентті манипуляциялау және жауапкершілік мәселесі» тақырыбында баяндама жасады.

Баяндамада рухани жетекшілікке еліктейтін цифрлық бейнелердің пайда болуына байланысты заманауи сын-қатерлер қарастырылып, шынайы рухани тәжірибені технологиялық еліктеумен алмастыру қаупі көрсетілді. Діни салада айтылатын сөз үшін жеке жауапкершіліктің қажеттілігіне ерекше назар аударылды.

Осы секция аясында Алматы Православие рухани семинариясының студенті Ярослав Макарчук «Жасанды интеллектіні пайдалану кезіндегі жауапкершілік шекаралары: философиялық-этикалық талдау» тақырыбында баяндама ұсынды. Студенттің сөзі цифрлық орта жағдайындағы адамның жауапкершілігі және қазіргі дүниетанымды қалыптастырудағы технологиялардың рөлі мәселелерін пайымдауға арналды.

Семинария оқытушылары мен студенттерінің конференцияға қатысуы рухани білім берудің жасанды интеллектіні дамыту және оның қазіргі қоғамға ықпалына байланысты өзекті ғылыми әрі қоғамдық диалогқа белсенді түрде тартылғанының маңызды дәлелі болды.