«Есірткісіз Қазақстан» қоғамдық қорының жетекшісі протоиерей Анатолий Измеров «Зорлық-зомбылықсыз отбасы: диалог, алдын алу, қорғау» форумының жұмысына қатысты.

29 сәуір 2025 жылы, Астана және Қазақстан митрополиті Александрдың батасымен, Қазақстан православиелік дәрігерлер қоғамының төрағасы, «Есірткісіз Қазақстан» қоғамдық қорының жетекшісі протоиерей Анатолий Измеров «Зорлық-зомбылықсыз отбасы: диалог, алдын алу, қорғау» форумының жұмысына қатысты.

Іс-шара Алматы қаласындағы Абай атындағы Қазақ педагогикалық университетінде өтті.

Форумды әлеуметтік және жастар саясаты мәселелері басқармасына қарасты Психологиялық қолдау қызметі ұйымдастырды.

Жиын отбасында зорлық-зомбылықтың алдын алу, неке институтын және дәстүрлі отбасы құндылықтарын нығайту мәселелеріне арналды.

Форумның мақсаты – отбасы құндылықтарын сақтау, зорлық-зомбылықтың алдын алу және отбасы құқықтарын қорғау мәселелерін талқылау, сондай-ақ осы бағытта тиімді шаралар қабылдау.

Іс-шараға қатысқандар: Алматы қаласының прокуроры С.Кәріпбеков; Оңтүстік астананың полиция басқармасының басшысы А.Заппаров; Алматы қаласы әкімінің орынбасары А.Нүсіпов; мемлекет және қоғам қайраткері О.Асанғазы; Басқарма төрағасы – Абай атындағы ҚазҰПУ ректоры Б.Тілеп; Алматы қаласы бойынша Бала құқықтары жөніндегі уәкілі Д.Ерланқызы; жергілікті атқарушы, мемлекеттік органдар мен діни ұйымдардың өкілдері.

Форум жұмысы барысында протоиерей Анатолий Измеров отбасылық өмірдің рухани-адамгершілік негіздері тақырыбында алғы сөзін сөйледі. Тәлімгер христиандық некені қасиетті одақ ретінде түсінуге негізделген сүйіспеншілікке, құрметке және жауапкершілікке тәрбиелеудің маңыздылығын атап өтті. Анатолий әке дағдарыс жағдайындағы отбасыларды қолдаудағы Шіркеудің рөліне және тұрмыстық зорлық-зомбылықпен тиімді күресу үшін әртүрлі қоғамдық институттар арасындағы диалогтың қажеттілігіне ерекше назар аударды. Өз баяндамасын жалғастыра отырып  дін қызметкері «Есірткісіз Қазақстан» қоғамдық қорының осы саладағы жұмысына қысқаша тоқталды.

Сөзінің соңында спикер жиналғандардың сұрақтарына жауап берді және отбасын қолдау және балаларды қорғау саласындағы шіркеу тәжірибесімен бөлісті.

Мұндай іс-шараларға православиелік діни қызметкерлердің қатысуы шіркеу мен қоғам арасындағы байланысты нығайтуға, өзекті әлеуметтік мәселелерді шешуде сенім мен ынтымақтастық атмосферасын құруға ықпал етеді.