ҚАЗАҚСТАНДАҒЫ ПРАВОСЛАВИЕ ШІРКЕУІ

ҚАЗАҚСТАНДАҒЫ ПРАВОСЛАВИЕ ШІРКЕУІ

КАZ | ENG | RUS
Конфессияаралық диалог
19.11.2026, 18:00

Митрополиттік округтің басқарушысы «Әлемдік және дәстүрлі діндер лидерлері Съезі аясындағы конфессияаралық және гуманитарлық ынтымақтастық» атты дөңгелек үстелге қатысты

Митрополиттік округтің басқарушысы «Әлемдік және дәстүрлі діндер лидерлері Съезі аясындағы конфессияаралық және гуманитарлық ынтымақтастық» атты дөңгелек үстелге қатысты

17 қараша 2026 жылы Астана қаласында «Әлемдік және дәстүрлі діндер лидерлері Съезі аясындағы конфессияаралық және гуманитарлық ынтымақтастық» тақырыбында халықаралық дөңгелек үстел өтті.

Іс-шараны Конфессияаралық және дінаралық диалогтың халықаралық орталығы Егеменді Мальта орденімен бірлесіп, Қазақстан Республикасының Қасиетті Тақ пен Егеменді Мальта ордені жанындағы Елшілігінің қолдауымен ұйымдастырды.

Бейнебайланыс форматында өткен дөңгелек үстелге Астана және Қазақстан митрополиті Александрдың батасымен Астана епархиясының викарийі, Қаскелең епископы Геннадий қатысты.

Кездесуге қатысқандар:  Егеменді Мальта орденінің халықаралық істер жөніндегі Бас хатшысы Джампаоло Кантини, Қазақстанның мемлекеттік құрылымдарының, KazAID, Қызыл Жарты Ай қоғамының, University Medical Center, Caritas, UNICEF Жастары, Ұлттық волонтерлік желі өкілдері, дипломатиялық корпус мүшелері, діни бірлестіктердің, халықаралық гуманитарлық ұйымдардың, медицина қауымдастығының және жастардың волонтерлік қозғалыстарының өкілдері.

Конфессияаралық және дінаралық диалогтың халықаралық орталығы Басқарма төрағасы Гүлсана Қожабай өзінің құттықтау сөзінде Халықаралық орталық пен Егеменді Мальта орденінің қызмет бағыттары әртүрлі болғанымен, ортақ миссия біріктіретінін атап өтті. Халықаралық орталық конфессияаралық диалог арқылы бейбітшілік пен өзара түсіністікті нығайтса, Мальта ордені тоғыз ғасырдан астам уақыт бойы гуманитарлық көмек көрсету арқылы мейірімділік қағидаттарын жүзеге асырып келеді.

2026 жылғы 7 қазанда Қазақстанның Вице-президенті Ерлан Қариннің төрағалығымен өткен Съезд Хатшылығының XXIV отырысында қабылданған шешімдерді іс жүзінде жүзеге асыру мәселелеріне ерекше назар аударылды. Атап айтқанда, екі құжат таныстырылды: «Діни салада жасанды интеллектіні пайдаланудың этикалық кодексі» және «Климаттың өзгеруіне қарсы күрестегі діндердің рөлі». Сонымен қатар гуманитарлық күн тәртібі Қасиетті Тақпен ынтымақтастық аясында әзірленген «Жазылмайтын ауруға шалдыққан баланың құқықтары туралы хартиямен» толықтырылды.

Осы тұрғыда Егеменді Мальта орденінің медициналық және әлеуметтік көмек көрсету саласындағы халықаралық тәжірибесі, сондай-ақ «Бамбино Джезу» балалар ауруханасы мен Қазақстанның медициналық ұйымдарының қызметі ерекше маңызға ие болды.

Егеменді Мальта орденінің халықаралық істер жөніндегі Бас хатшысы Джампаоло Кантини ұйым қызметінің негізгі бағыттарын таныстырып, орденнің тоғыз ғасырдан астам уақыт бойы шығу тегіне және діни сеніміне қарамастан мұқтаж жандарға медициналық, әлеуметтік және гуманитарлық көмек көрсетіп келе жатқанын атап өтті. Бүгінде оның қызметі 130 елді қамтиды және халықтың әлеуметтік осал топтарын қолдауды, босқындарға, қарулы қақтығыстар мен табиғи апаттардан зардап шеккендерге көмек көрсетуді қамтиды.

Климаттың өзгеруінің гуманитарлық салдарына да ерекше назар аударылды. Қатысушылар төтенше жағдайларға ден қою, зардап шеккен халыққа көмек көрсету және гуманитарлық дағдарыстар жағдайында жұмыс істеуге еріктілерді даярлау мәселелерін қарастырды. Бұл бағыттар Съездің «Климаттың өзгеруіне қарсы күрестегі діндердің рөлі» атты құжатында көрініс тапқан қағидаттармен үндеседі. Аталған құжат экологиялық мәселелерді шешуге діни қауымдастықтардың қатысуын кеңейтуді көздейді.

«Әлемдік және дәстүрлі діндер лидерлері Съезі аясындағы конфессияаралық және гуманитарлық ынтымақтастық» тақырыбындағы дөңгелек үстелді ұйымдастырушылар мен қатысушыларға шын жүректен сәлем жолдаймын!

2025 жылғы қазанда өткен әлемдік және дәстүрлі діндер лидерлерінің VIII Съезінің шешімдері өмірде жүзеге асып жатқанын көріп отырмыз. Форумда қабылданған 2025 жылғы Астана бейбітшілік декларациясында цифрлық технологияларды, жасанды интеллект пен биоинженерияны қоса алғанда, жаңа технологияларды жауапкершілікпен пайдалану қажеттігі атап көрсетілген болатын. Жасанды интеллектіні дамытудағы жетістіктерге қарамастан, шынайы жанашырлық пен сүйіспеншілік таныту қабілеті тек адамға ғана тән қасиет болып қала беретіні, ал осы қасиеттерді тәрбиелеу адамзаттың гуманистік және рухани-адамгершілік дамуының негізіне айналуы тиіс екені ерекше атап өтілді. Осы айтылған идеялар 2026 жылғы қазанда Съезд Хатшылығының отырысында қабылданған «Жазылмайтын ауруға шалдыққан баланың құқықтары туралы хартияның» негізіне алынды.

Дәстүрлі дін өкілдері үшін Хартияның 9-бабы ерекше маңызға ие. Онда былай делінген: «Бала мен оның отбасы рухани қолдаудың қолжетімді түрлері туралы ақпарат алуға да құқылы. Баланың және/немесе оның отбасының ерікті өтініші бойынша, егер мұндай қолдау қолжетімді болса, денсаулық сақтау ұйымы оны ұсынуға жәрдемдесуі тиіс. Осы мақсатта денсаулық сақтау ұйымы баланың және оның отбасының діни наным-сенімдері мен дүниетанымын ескере отырып, ұлттық заңнама мен денсаулық сақтау ұйымының ішкі қағидаларын сақтай отырып, бала мен оның отбасына рухани қолдау көрсету үшін рухани тәлімгерді, дін қызметкерін немесе өзге де тұлғаны шақыра алады». Православие Шіркеуінің көзқарасы бойынша, адамның тән саулығына қамқорлық жасау оның өміріндегі абсолютті әрі өздігінен жеткілікті мақсат болып табылмайды. Иса Мәсіх: «Жан тамақтан артық емес пе?» (Мф. 6:25) деп сұрайды. Інжілдің басқа бір жерінде Құтқарушы: «Егер адам бүкіл дүниеге ие болып, өз жанын жоғалтса, бұдан оған не пайда?» (Мф. 8:36) дейді. Православиелік ілімге сәйкес, адам өлмейтін жан мен өлетін тәннен тұрады. Сондықтан тән саулығы адам болмысының тұтастығын құрайтын қырлардың бірі ғана болып табылады. Орыс Православие Шіркеуінің «Әлеуметтік тұжырымдамасының негіздерінде» шіркеудің денсаулық сақтау саласындағы қызметі «азап шегушілерге Киелі Рухтың рақымын жеткізуге бағытталғаны» атап көрсетіледі. Бұл ретте шіркеудің құтқарушы қасиетті рәсімдеріне қатысу және емдеу мекемелерінде дұға ету ахуалын қалыптастыру, сондай-ақ пациенттерге қайырымдылық көмектің сан алуан түрін көрсету басты орын алады.

Қазақстан Православие Шіркеуінің дін қызметкерлері науқас балаларға пастырлық қамқорлық көрсету барысында «Әлеуметтік тұжырымдаманың негіздерінде» баяндалған қағидаттарды басшылыққа алады. Бұл қызмет шіркеудің қамқорлығымен жұмыс істейтін әлеуметтік мекемелерде, атап айтқанда Алматы облысындағы «Солнышко» балалар үйінде, көптеген епархияларда құрылған мейірбикелік қызметтерде, сондай-ақ балалар хоспистерін қоса алғанда, хоспистерде жүзеге асырылады. Бұл мекемелерде біздің дін қызметкерлеріміз де қызмет атқарады.Жазылмайтын ауруға шалдыққан балалар, сөзсіз, медицина мамандары тарапынан білікті паллиативтік көмекке мұқтаж.

Алайда балаға азап шегудің терең діни мәнін ұғынуға көмектесу де кем емес маңызды. Менің терең сенімім бойынша, бұл мән діни көзқарас тұрғысынан ғана толық ашылады. Адам өз азабының белгілі бір мәні бар екенін түсінген кезде, сынақтарды жеңілдеу көтере бастайды, кейде тіпті қуанышпен де қабылдай алады. Өз қасіретінің мәнсіз әрі үмітсіз екенін сезіне отырып азап шегуден ауыр ештеңе жоқ. Мұндай күйді тозақпен салыстыруға болады. Австриялық психиатр әрі философ Виктор Франкл осыған ұқсас жағдайды «экзистенциалдық вакуум» ұғымымен сипаттаған. Ойшыл оның пайда болу себептерінің бірі ретінде дәстүрлерден, ең алдымен діни дәстүрлерден қол үзуді атаған.

Христиан дінінде азап шегудің мәні, атап айтқанда, елші Пауылдың Қорынттықтарға арналған екінші хатындағы мына сөздер арқылы ашылады: «Өйткені Мәсіхтің азаптары бізде қаншалықты мол болса, Мәсіх арқылы алатын жұбанышымыз да соншалықты мол» (Кор. 2-хат 1:5). Дін қызметкері немесе христиан дәрігер жазылмайтын ауруға шалдыққан балаға Иеміз Иса Мәсіхтің адамзатты құтқару жолындағы құрбандығы туралы айтып, оның жүрегінде Құтқарушыға деген сүйіспеншілікті оятуға тырыса алады. Мәсіхтің азаптары туралы ой жүгіртудің өзі Иемізді сүйетін жандар үшін рухани жұбаныштың қайнар көзі бола алады. Өйткені біз жақсы көретін жанның тағдырына ортақтасу, тіпті ол ауыр сынақтармен байланысты болса да, тек азап ретінде ғана емес, сүйіспеншілік пен рухани жақындықтың көрінісі ретінде де қабылдануы мүмкін екенін білеміз. Сөзімді қорытындылай келе, әлемдік және дәстүрлі діндер лидерлері Съезінің аясында түрлі дін өкілдері арасындағы гуманитарлық ынтымақтастық одан әрі дами түседі деп үміттенемін», – деп атап өтті өз баяндамасында Қаскелең епископы Геннадий.

Талқылаудың негізгі тақырыптарының бірі халықаралық волонтерлік қозғалыс аясында тәжірибе алмасу болды. Діни және жастар бірлестіктерінің өкілдері еріктілерді бірлесіп даярлау, білім беру бастамаларын жүзеге асыру және гуманитарлық қызмет саласындағы тәжірибе алмасу мүмкіндіктерін қарастырды.

«UNICEF Жастары» ұлттық волонтерлік бағдарламасының жетекшісі еріктілер қызметінің нәтижелерін таныстырды: 20 мың ағаш отырғызылып, 700 тоннадан астам қалдық жиналып, қайта өңдеуге жіберілген. Ол сондай-ақ еріктілердің өз қызметіне қанағаттану деңгейіне ерекше назар аударды. Бұл көрсеткіш 98,5%-ды құраған.

«Ұлттық волонтерлік желі» заңды тұлғалар бірлестігінің атқарушы директоры Татьяна Миронюк Мальта орденімен төтенше жағдайлар кезінде жұмыс істеу үшін еріктілер мен волонтерлік қызмет үйлестірушілерін оқыту және даярлау саласында ынтымақтастық орнатуға қызығушылық білдірді. Оның айтуынша, халықаралық ұйымдар төтенше жағдайларға ден қоюдың әртүрлі алгоритмдерін қолданады. Осыған байланысты дағдарыс жағдайларында еріктілердің жедел әрі кәсіби әрекет етуі үшін тәжірибе алмасу және ортақ тәсілдерді келісу маңызды.

Дөңгелек үстел қорытындысы бойынша қатысушылар одан әрі ынтымақтастықтың перспективалық бағыттарын, оның ішінде сарапшылар арасындағы тәжірибе алмасу, білім беру бағдарламалары және медициналық, әлеуметтік әрі гуманитарлық көмек көрсету саласындағы бірлескен бастамаларды әзірлеуді айқындады.

Пікірлер әлі жоқ

Пікір жазу үшін жүйеге кіріңіз немесе тіркеліңіз!

Сілтеме көшірілді