Оңтүстік астананың бас храмында «Пасхалық ән» фестиваліне қатысушылардың біріккен хоры жексенбілік Литургияның әндерін орындады

2026 жылғы 17 мамыр – Пасхадан кейінгі 6-апта, «Соқыр туралы» жек сенбі; Тарсийск қаласының қызы, азап шегуші Пелагияны еске алу күні.

Астана және Қазақстан митрополиті Александр Алматы қаласындағы Вознесенский кафедралды соборында Құдайлық Литургияны өткізді.

Қазақстан Православие Шіркеуінің Басшысына қызмет еткендер: Астана епархиясының викарийлері – Талдықорған епископы Клавдиан мен Талғар епископы Вениамин; Оңтүстік астана храмдарының құрметті өкілі, Никольский соборының басшысы протоиерей Валерий Захаров; архимандрит Геронтий (Борисевич); Алматы қаласындағы Құдай Анасының «Барлық қайғырғандаға Қуаныш» иконасы құрметіне арналған храмның басшысы протоиерей Евгений Воробьев; епархиялық әулиелерді заңдастыру бөлімінің жетекшісі архимандрит Иосиф (Еременко); Вознесенский кафедралды соборының кілтшісі, Митрополиттік округтің қоғаммен байланыс бөлімінің жетекшісі протоиерей Александр Суворов; Митрополиттік округ Басшысының хатшысы иеромонах Димитрий (Байдек); протоиерей Димитрий Сидоров; митрополит хатшылығының жетекшісі иеромонах Прохор (Ендовицкий); Митрополиттік округ Басшысының әкімшілік хатшылығының жетекшісі иерей Георгий Сидоров; Алматыдағы Қазан соборының басшысы иерей Георгий Рублинский; протодиакон Николай Гринкевич; митрополиттің протокол қызметінің жетекшісі протодиакон Роман Головин; протодиакон Владимир Сыровацкий; диакон Андрей Плетень; диакон Виталий Быструшкин; иеродиакон Софония (Мазуренко); диакон Александр Пивень; диакон Иоанн Жучков; диакон Георгий Ткаченко.

Құлшылықта дұға еткендер:  «Eleos-Meirim» қоғамдық қорының президенті В.М. Капсамун; Алматы епархиялық басқармасының қызметкерлері, Алматы православиелік рухани семинариясының студенттері және көптеген прихожандар.

Бұл жексенбілік құлшылықтың ерекшелігі – Литургия барысында «Пасхалық ән» халықаралық фестиваліне қатысушылардың ән айтуы болды. Қазақстанның Оңтүстік астанасында Мәскеу және бүкіл Русь Патриархы Кириллдің батасымен өтіп жатқан хор фестиваліне Митрополиттік округтің барлық епархияларынан келген хор ұжымдары мен Ресейден арнайы қонақтар қатысты.

Фестиваль, сондай-ақ Қазақстан Православие Шіркеуінің өзге де мәдени, ағартушылық, білім беру және жастар жобалары «Eleos-Meirim» қоғамдық қорының президенті В.М. Капсамунның қайырымдылық қолдауымен ұйымдастырылуда.

150 адамнан құралған біріккен хорды Мәскеу және бүкіл Русь Патриархы жанындағы орыс шіркеулік ән өнерін дамыту жөніндегі Шіркеу-қоғамдық кеңестің мүшелері басқарды: Қазақстан Митрополиттік округі хорының регенті, Ресейдің еңбек сіңірген өнер қайраткері О.Н. Овчинников; Мәскеу Синодалдық хорының көркемдік жетекшісі әрі бас дирижері, Ресей Федерациясының еңбек сіңірген әртісі А.А. Пузаков; Мәскеудегі Елохов Богоявлен кафедралды соборы хорының регенті А.К. Майоров және Мәскеу қаласының Солнцево ауданындағы Радонеждік Сергий храмының «Артос» хорының регенті В.А. Волкова.

Біріккен хормен бірге Литургияға Н.О. Головинаның жетекшілігімен Алматы жексенбілік мектептерінің біріккен балалар хоры да қатысты.

Қасиетті өлеңнен кейінгі  уағызды архимандрит Иосиф (Еременко) оқыды.

Литургия соңында пасхалық мадақтау өтті – дін қызметкерлері, біріккен хор және жамағат Қасиетті Пасханың стихираларын орындады. Осыдан кейін әмірші митрополит көне және қазіргі түрлі тілдерде «Христос воскресе!» деп үн қатты.

Мәскеу және бүкіл Русь Патриархы, Орыс Православие Шіркеуінің Басшысы Қасиетті Кириллге; Митрополиттік округтің Басшысына, архипастырларына, дін қызметкерлеріне, монашестволық қауымына және паствасына; Қазақстан Президентіне, билік өкілдеріне, әскерге және бүкіл халқына көпжылдық жария етілді.

Жоғары мәртебелі иерархтарды, дін қызметкерлері мен миряндарды жексенбілік күн – кіші Пасхамен құттықтап, тағылымды сөз сөйледі.

Митрополиттік округтің Басшысы әншілерге атқарған еңбектері мен рухани шығармаларды жоғары деңгейде орындағандары үшін алғысын білдірді. Әмірші митрополит шіркеулік хор өнері елдегі Православие дәстүрлерін сақтауда маңызды рөл атқаратынын, қалалық және ауылдық приходтардағы белсенді сенушілерді, әсіресе жастарды біріктіретінін атап өтті.

«Икон жазу өнерін “бояулардағы богословие” деп атайтыны сияқты, шіркеулік музыканы да “дыбыстардағы богословие” деп атауға әбден болады. Ежелгі дәуірден бүгінгі күнге дейін православие храмдарында шырқалып келе жатқан әндер адамды жалқаулық пен немқұрайлылықтан оятып, рухани еңбекке шабыттандыратын, ақыл мен жүректі жаңартуға ықпал ететін тамаша құрал болып табылады. “Тасқын кезіндегі теңіз қандай әсем болса, – деп жазады Ұлы Василий әулие, – дәл сол сияқты ерлердің, әйелдердің және балалардың бір дауыспен Құдайға дұға арнап, жағалауға соққан толқын секілді көтерілетін құлшылығы одан да әсем емес пе?” Православие Шіркеуі өзінің көпғасырлық тарихында рухани-музыкалық мұраның баға жетпес қазынасын жинақтады. Оның құрамына ежелгі византиялық әуендер, монастірлік ғибадатханалардың ерекше распевтері, ортағасырлық әуендерді өңдеп, қайталанбас авторлық шығармалар жазған көрнекті композиторлардың туындылары енді. Бүгінде балалар мен жастардың православиелік музыкалық мәдениетке қызығушылық танытып отырғаны қуантады. Приходтық жексенбілік мектептерде шіркеулік ән өнері оқытылып, ересектермен қатар құлшылық өміріне қатысатын хор ұжымдары құрылуда. Құдай қаласа, рухани ағартудың бұл бағыты алдағы уақытта да белсенді түрде дами берсін. “Пасхалық ән” хор фестиваліне қатысқан барша жанға, әсіресе жас әншілерге шығармашылық табыс тілеймін және бәрімізге Құдай Шіркеуін терең әрі шынайы сүйе білуді бұйыртсын», – деді, атап айтқанда, Қазақстан Православие Шіркеуінің Басшысы.

Митрополиттік құлшылықтың бейнетүсірілімін Қазақстан Митрополиттік округінің «Семиречье» телестудиясы (директоры – мәдениет саласының еңбек сіңірген қызметкері В.Л. Посаднева) жүзеге асырды; фототүсірілімді ақпарат бөлімінің қызметкері А. Щеглов жүргізді.

Музыкалық форумның аяқталуына орай митрополит Александр салтанатты қабылдау ұйымдастырды.

«Бүгін Құдайлық Литургия барысында апостолдардың Істері кітабынан үзінді оқылды – онда Мәсіхтің шәкірттері Павел мен Силаның түрмеден керемет түрде босатылуы туралы баяндалады. Әуелде елшілердің түнгі жалынды дұғасының куәсі болған, кейін түрменің барлық есіктерін ашқан жер сілкінісін және тұтқындардың кісеннен ғажайып түрде босатылғанын көрген түрме күзетшісі, күзет бастығы Павел мен Силаға өміріндегі ең маңызды сұрақты қояды. Ерте ме, кеш пе, мұндай сұрақ әрбір ойланатын адамның алдында тұрады. Ізгі хабарды таратушылардың алдына тағзым еткен күзетші: “Құтқарылуым үшін не істеуім керек?” – деп сұрайды. Сонда ол қарапайым әрі сонымен бірге толық жауап естиді: “Иеміз Иса Мәсіхке сен, сонда өзің де, бүкіл үй ішің де құтқарыласыңдар”. Бұл адам өмірдің мәнін шын жүректен іздеді, сондықтан Жаратқан Ие оған апостолдық өсиет арқылы Ақиқатқа апарар жолды ашып, құтқарылу есігін айқара ашты және сенімнің өмір сыйлайтын нұрын көрсетті.

Бүгінгі апостолдық оқылым туралы ой толғай отырып, әулие Иоанн Златоуст: “Түрме күзетшісінен асқан қатігез, одан өткен қатал адам бар ма?” – деп сұрайды. Бірақ жүрегі қатайған сол адамның өзі сенімге келіп, қуанышқа бөленді және бүкіл отбасымен бірге Шомылдыру рәсімін қабылдады. Рухани көрегендік пен Мәсіхке – әрбір адамды нұрландырып, қасиеттейтін Шынайы Жарыққа деген сенім тақырыбы Інжіл оқылымында жалғасын табады. Апостол әрі евангелист Иоанн Богослов бізге Жаратқан Иенің туа біткен соқыр адамды сауықтырғаны туралы баяндайды. Құтқарушы ана құрсағынан бастап осы ұлы игіліктен айырылған адамға материалдық жарықты және айналадағы әлемді көру мүмкіндігін сыйлады. Алайда бұдан да маңызды ғажайып – көру қабілетіне ие болу оның рухани көзінің ашылуына бастау болды. Ол Құдай Ұлына сенді, ал Заңды терең білеміз деп мақтанған, Жазба мен Дәстүрдің ең нәзік тұстарын жетік меңгерген дін мұғалімдері мен фарисейлердің рухани көздері соқыр күйінде қалды, физикалық көздері көріп тұрса да, рухани ақиқатты тани алмады.

Бүгін Құдай сөзі бізге тек Иеміз Иса Мәсіхке деген сенім ғана мәңгілік құтқарылуды сыйлайтынын, күнәдан қараңғыланған рухани көздерді сауықтыратынын және жарқын күн сәулесіндей христианның өмір жолын нұрландырып, рухани шындықтарды айқын көруге, жақсылық пен жамандықты, ақиқат пен жалғанды, мәңгілік пен өткінші дүниені ажырата білуге көмектесетінін үйретеді». Митрополит Александрдың уағызынан.