Алматыда Рождестволық Митрополиттік шырша өтті

10–11 қаңтар 2026 жыл. Алматы.

Астана және Қазақстан митрополиті Александрдың батасымен  Мемлекеттік Академиялық Корей театрында алты Рождестволық Митрополиттік шырша мерекесі өтті.

Іс-шараны Алматының Никольский соборы жанындағы мектеп директоры Г.В. Черепанова басқарған Орталық жексенбілік мектеп ұйымдастырды. Балалар мерекесін дайындау мен өткізуге диакон Владимир Алферов пен иеродиакон Афанасий (Козел) белсенді түрде атсалысты.

Қойылымдар басталар алдында балаларды, олардың ата-аналарын және жексенбілік мектеп оқытушыларын Рождество мерекесімен Қазақстан Митрополиттік округінің істер басқарушысы, Қаскелең епископы Геннадий құттықтады.

Орталық жексенбілік мектептің тәрбиеленушілері Шарль Перроның «Золушка» ертегісінің желісі бойынша қойылған «Золушканың Рождество түніндегі саяхаты» атты қызықты музыкалық спектакльді ұсынды. Танымал сюжет жаңа қырынан ашылып, ертегі кейіпкерлері Иса Мәсіхтің дүниеге келу оқиғасының куәгерлеріне айналды.

Қойылымға 5 жастан 18 жасқа дейінгі Орталық жексенбілік мектептің 34 оқушысы, сондай-ақ Алматы православиелік рухани семинариясының студенттері қатысты. Сахналық безендірулер мен костюмдер мектеп ұстаздары мен тәрбиеленушілерінің қолымен дайындалды.

Әдемі қойылымды алматылық балалар, олардың ата-аналары, сондай-ақ көпбалалы және аз қамтылған отбасылар тамашалады.

Спектакльден кейін театр фойесінде Рождестволық шырша жанында ертегі кейіпкерлерінің қатысуымен би билеу, шеңбер құрып ойындар өткізу және түрлі байқаулар ұйымдастырылды.

Мереке соңында барлық жас қатысушылар «Eleos-Meirim» қоғамдық қорынан (президенті – В.М. Капсамун) сыйлықтар алды.

Биыл Рождестволық қойылымды 3000 адам тамашалады.