Шымалған станциясындағы Владимирский приходында география пәнінен балалар олимпиадасы өтті

25 қазан 2026 жыл. Астана және Қазақстан митрополиті Александрдың батасымен Шымалған станциясындағы Владимирский приходында Алматы епархиясының жексенбілік мектептерінің тәрбиеленушілері арасында география пәнінен олимпиада өтті.

Зияткерлік сайыс басталар алдында Қазақстан мектептеріне арналған география және дүниетанудан оқулықтардың авторы Г.Е. Головина Австралия мен Мұхит аралдары туралы шолу дәрісін оқыды. Галина Евграфовна жас тыңдармандарға Жасыл құрлықтың ашылуы мен зерттелу тарихы, жер бедері, пайдалы қазбалары, климаты, ішкі сулары, табиғат зоналары, сондай-ақ материктің өсімдіктері мен жануарлар дүниесі туралы айтып берді.

Іс-шараның арнайы қонағы алматылық кинолог Оксана Моховикова болды. Ол балаларды өзінің австралиялық овчаркасымен таныстырып, ит тұқымының ерекшеліктері, шығу тарихы және бақташылық қызметте қолданылуы туралы әңгімеледі.

Одан әрі олимпиада қатысушыларына Австралия мен Мұхит аралдарының физикалық географиясы бойынша мектеп оқушыларының білімін тексеруге арналған сұрақтар ұсынылды.

Зияткерлік сайыстың жеңімпаздары атанғандар: ең көп ұпай жинаған Варвара Лукашова (Боралдай кентіндегі Иверск шіркеуінің жексенбілік мектебі), Иван Ершов (Алматы қаласындағы Апостол Иоанн Богослов шіркеуі), Ирина Голоус (Кольди кентіндегі қасиетті азапкер Елисавета шіркеуі) және Марк Пылайкин (Байкент ауылындағы Саров әулиесі Серафим құрметіне арналған приход).

Іс-шараның барлық қатысушыларына Алматы епархиялық басқармасы сыйға тартқан үстел ойындары, кітаптар, дәптерлер мен төсбелгілер табысталды.