Митрополиттік округ Басшысының Иран Ислам Республикасының ғылыми және қоғам қайраткерлері делегациясымен кездесуі өтті

2026 жылғы 8 қараша. Алматы. Қазақстан Митрополиттік округінің митрополит Иосиф (Чернов) атындағы рухани-мәдени орталығының камин залында Қазақстан Православие шіркеуінің басшысы, Астана және Қазақстан митрополиті Александрдың Иран Ислам Республикасының ғылыми және қоғам қайраткерлері делегациясымен кездесуі өтті.

Делегация құрамында болғандар: Иран Ислам Республикасының Алматыдағы Бас консулы Сона Ахмади; Иран Ислам Республикасының Бас консулдығының мәдени мәселелер жөніндегі атташесі Мохаммад Масуд Садеги; Тегеран университетінің профессоры Али Нематоллах Пурманд; Тегеран университетінің профессоры Хамид Парсания; Бакир әл-Улум университетінің өкілі Махди Мосаеб Горджиян; Әл-Мустафа халықаралық университеті философия және діндер факультетінің доценті, доктор Реза Мохаммад Али Азариян; аудармашы Нурадил Досмурат.

Кездесуге қатысқандар: Алматы қаласындағы Вознесенск кафедралды соборының кілтшісі, Митрополиялық округтің қоғаммен байланыс бөлімінің жетекшісі протоиерей Александр Суворов; Алматы православие рухани семинариясының ректоры, Митрополиялық округтің ақпараттық-баспа бөлімінің жетекшісі протоиерей Евгений Иванов; Митрополиттік округ Басшысының жеке хатшысы иеромонах Димитрий (Байдек); Қостанай епархиясы хатшысының міндетін атқарушы иеромонах Геннадий (Бурдюжа); Митрополиттік округ Басшысының әкімшілік хатшылығының жетекшісі иерей Георгий Сидоров; митрополиттің хаттама қызметінің жетекшісі протодиакон Роман Головин.

Сәлемдесуден кейін Иран делегациясының өкілдері митрополит Александрмен алдыңғы күні Алматы қаласындағы Вознесенский кафедралды соборына жасаған сапарларынан алған жағымды әсерлерімен бөлісті. Қазақстан Православие Шіркеуінің Басшысының батасымен қонақтарға экскурсияны протоиерей Александр Суворов жүргізді.

Иерарх қонақтарға Алматы қаласының басты храмында 2017–2020 жылдары жүргізілген ауқымды кәсіби реставрация жұмыстарының барысы туралы баяндады. Барлық жұмыстардың Қазақстан Республикасы Мәдениет министрлігі мен ЮНЕСКО бақылауымен, Қазақстан, Ресей, Сербия, Италия, Германия және Франция елдерінің жоғары білікті мамандарын тарта отырып жүзеге асырылғаны атап өтілді. Иерарх ауқымды жобаны Мемлекет басшысы Қ.-Ж. К. Тоқаев «жалпықазақстандық қасиетті орынның екінші рет дүниеге келуі» деп атағанын атап өтті.

Әңгіме барысында митрополит Александр қонақтарға 2027 жылы атап өтілетін Түркістан епархиясының құрылғанына 155 жыл толуына арналған мерекелік іс-шараларға дайындық жұмыстары туралы айтып берді. Қазіргі Қазақстан мен Орталық Азия елдерінің аумағындағы православие дінінің тарихына тоқталған архипастырь Алматы қаласының көктегі қамқоршысы, Верный және Жетісу епископы, әулие азап шегуші Пименнің (Белоликов) тұлғасына ерекше назар аударды.

Митрополиттік округ Басшысы болашақ әулие азап шегуші Верный кафедрасына тағайындалғанға дейін көптеген жылдар бойы Парсы жеріндегі Орыс Православие шіркеуінің Урмия рухани миссиясында қызмет етіп, жергілікті христиандарды ағартумен, сондай-ақ құлшылық мәтіндері мен қасиетті әкелердің еңбектерін аударумен айналысқанын жеткізді. Митрополит Александр әулие Пименнің қызметі Қазақстан мен Иран арасындағы ежелден қалыптасқан тарихи және рухани байланыстардың айғағы екенін атап өтті.

Қонақтар иерархқа «Әл-Фарабидің теориялық және практикалық даналықты дамытудағы орны» тақырыбындағы халықаралық дөңгелек үстелге және ҚазҰУ мен Ислам әлемінің білім, ғылым және мәдениет мәселелері жөніндегі ұйымы (ICESCO) бірлесіп ұйымдастырған «Әл-Фараби және оның адамзат тарихына қосқан үлесі» атты II халықаралық конференцияға қатысқандары туралы айтып берді.

Ғылыми кездесу 2027 жылғы 21–22 қаңтарда Иран Ислам Республикасының Кум қаласында өтетін халықаралық конференция Хатшылығының алғашқы отырысына арналды. Кездесудің негізгі мақсаты Әбу Насыр әл-Фарабидің ғылыми-философиялық мұрасын жан-жақты зерттеу, оның қазіргі қоғам үшін маңызын айқындау, сондай-ақ Қазақстан мен Иран арасындағы академиялық ынтымақтастықты нығайту болды.

Кездесуге қатысушылар Иран төңірегіндегі жалғасып жатқан халықаралық қақтығысқа қатысты пікір алмасты. Жоғары мәртебелі қонақтар Иран Ислам Республикасының Жоғарғы жетекшісі Сейед Әли Хаменеидің қаза табуына байланысты Иран халқына көңіл айту жеделхатын жолдаған Мәскеу және бүкіл Русь Патриархы Кириллге өздерінің алғыс сөздерін Митрополиттік округ Басшысы арқылы жеткізуді өтінді.

Митрополит Александр тәуелсіздік жылдарында бейбітсүйгіш әрі ашық мемлекет ретінде танылған Қазақстан қажет болған жағдайда қарсылас тараптарға келіссөздер жүргізу үшін алаң ұсынуға дайын екенін атап өтті. Иерархтың айтуынша, Қазақстан Республикасының Президенті Қасым-Жомарт Тоқаев конфессияаралық келісімді нығайтуға, түрлі діни сенім өкілдері арасындағы өзара құрмет пен тату көршілік дәстүрлерін сақтауға ерекше көңіл бөледі. Оның Жоғары мәртебелілігі мемлекет басшылығы жүргізіп отырған саясат діни қауымдастықтар арасындағы сындарлы диалогтың дамуына және қоғамдық тұрақтылықтың нығаюына ықпал ететінін атап өтті.

Кездесу соңында Иран делегациясының өкілдері Қазақстан Митрополиялық округінің дін қызметшілерін 2027 жылғы ақпан айында Тегеран қаласында өтетін конфессияаралық конференцияға қатысуға шақырды.

Кездесу достық әрі жылы атмосферада өтті.

Митрополиттік округ Басшысы қонақтарға Жетісудың рухани және мәдени жауһары – Алматы қаласындағы Вознесенский кафедралды соборы туралы баяндайтын фотоальбом кітап пен Қазақстан Митрополиттік округінің күнтізбесін сыйға тартты.

Иран ғалымдары да иерархқа Тегеран университеті мамандарының орыс тіліне аударылған еңбектерін тарту етті.